Avviste å senda plan ut på ny høyring

Mindretalet meinte det var gjort så store endringar at reguleringsplanen for Børnes næringsområde måtte sendast ut på ny høyring. Men fleirtalet avviste dette.

Reguleringsplanen for Børnes næringsområde i Uskedalen kom opp til endå ei behandling i kommunestyret. Det låg føre innstilling om å godkjenna det nye forslaget, men det var ikkje alle samd i.

– Det er føreteke så store endringar i planen at innbyggjarane og bedriftene i Uskedalen må få koma med innspel. Den nye planen fører til svært uføreseielege tilhøve for bedriftene som er i området, sa Jostein Saghaug (MDG) og viste til støy- og støvproblem.

Marit Årthun (KrF) var heilt samd.

– Eg vart litt overgidd då eg las det nye forslaget og såg det var gjort så store endringar. Eg kan ikkje forstå anna enn at planen må ut på ny høyring, vurderte ho.

Andre mynde

Ove Lemicka (Frp) meinte derimot at det allereie har vore ein grundig prosess, og at det var viktig å gjera eit vedtak no. Han understreka at forureining og støy er lagt til sides i reguleringsplanen.

– Det er andre mynde som avgjer kva som er lov eller ikkje, minna han om.

Stein Olav Ølvestveit (Sp) var inne på det same.

– Den største striden har med steinknusing å gjera, men der er det lover og reglar som kjem inn, så vi treng ikkje ta det med i reguleringsplanen. Samstundes må vi ta på alvor at det kan skapa problem for dei som allereie er etablert der, så det er viktig at kommunen følgjer opp, sa han.

Forslaget om å senda planen ut på høyring fekk sju røyster (KrF, SF og MDG) og fall.