Avviser modulkai – lanserer spenstig forslag til bru over Bondesundet

I spørsmålsrunden i kommunestyret tok Per Svindland ordet og uttrykte sterk skepsis til ideen om flytande ferjekaimodul på Varaldsøy.

– Den er så svær at det ikkje er mogleg å få den inn der. Det er ikkje oppstillingsplass heller. Når ferja skal gå, står det bilar langt forbi oppstillingsplassen og opp i vegen, så det er nesten ikkje råd å koma forbi bilane som kjem frå ferja, sa han. Til Grenda utdjupa Svindland at ei slik løysing også vil koma i vegen for tømmerkaien.

Han bad difor ordføraren sjå meir på saka om ny ferjekai på Skjelnesodden, noko han meiner vil gje åtte minutt seglingstid til Årsnes. Samstundes fabulerte han litt kring ei bru over Bondesundet. Vegen til Øyarhamn finst allereie, og brua kan gjenbruka materiale frå oljeplattformar.

– Når dei gamle oljefelta ute i Nordsjøen vert hogne opp, så dreg vi «jacketane» (stålunderstell på oljeplattform) til Stord. Det er ein svær kranbåt som heiter «Saipem 7000», den kan ta tre sånne og leggja i Bondesund. Og så har han med seg vegdekke av betong og heiser alt på plass, då er det landfast. Det er ikkje noko problem i det heile, hevda Per Svindland.

Banehalvdel

Ordførar Vegard Bjørnevik (H) konsentrerte svaret sitt om Skjelnesodden.

– Kvinnherad kommune har over ein lengre periode spelt inn til fylkeskommunen at dei må sjå på nytt ferjestø på Skjelnesodden. Kvinnherad har føreslått å laga ein flytande ferjekaimodul, for å få gjort noko med sambandet på kortare sikt. Saka ligg no på fylkeskommunen sin banehalvdel. Dei som var til stades på det etter kvart berømte ferjemøtet på Varaldsøy, hugsar at det vart uttalt av politiske representantar at dei håpa å få ei sak om dette så snart som mogleg, sa Bjørnevik.