Avslutta kapittel med ny EP

Kjartan Thorkildsen (26) kjem frå Valen, men bur no i Oslo. I tru stil serverer han finurleg elektronisk musikk med overraskande, men høvelege lydelement på sin nye EP.

«Illumination» vart utgitt som singel 18. juni, og har dermed fungert som ein duggfrisk teaser på kva fansen hadde i vente. Denne låta vart nyleg snappa opp av NRK P3. Nina Gjertsen, programleiar for Urørt, sette pris på å ta del i opplevingsferda Thorkildsen inviterte på, og meinte det var vanskeleg å ikkje la seg rive med i hans univers, i sin omtale av låta. Dei tidlegare utgitte singlane «Time Stand Still» og «Euphoria» er også inkludert på den nye EP-en.

– Når ein har laga ein del låtar innanfor ein stilistisk sjanger, er det naturleg å runde av eit kapittel med å samla dei på ei utgjeving, fortel den utflytta kvinnheringen over telefon.

Lagar musikk som enno ikkje finst

Det er dette Thorkildsen no har gjort. Det vil dessutan koma fleire kapittel framover, mellom anna ei samling låtar med meir elektrovenleg pop.

Han fortel vidare at låta som vart trekt fram av P3 vart skrive i vinter.

– Alle låtane mine er jo ganske abstrakte, men den handlar litt om korleis ein kan bruke fantasien på best mogleg måte. Når alt var stusseleg i vinter lukka eg augene og visualiserte korleis eg helst ville ha det. Ein har absolutt moglegheita til å gjera noko med sitt eige liv, dersom ein jobbar hardt og har tru på at ein kan klara det, seier han.

Sjølv om Thorkildsen freistar å lage musikk som ikkje skal kunne definerast fordi det er nytt og annleis, er indie elektronika den næraste stilistiske skildringa ein kan kome av lydbiletet som Catnip Cloud serverer. Den nye utgjevinga er likevel smakfullt prega av den sjangerdefinerte musikken han sjølv lyttar til. I potten til den nye EP-en finn ein difor både pop, elektronisk dansemusikk, trance, hip hop og meditasjonsmusikk.

Nye prosjekt i emning

Sistnemnde kategori vil også gjera seg gjeldande i eitt av hans føreståande prosjekt.

– Eg har laga ein del roleg i det siste, litt i det same soundscapet som «Takeoff» frå den nye EP-en. Så eg har ein plan om å sleppe noko, i ein eller anna form, i den stilen, ambient som det heiter. Elles samarbeider eg med ein kompis om å gi ut eit lite album i august. Der blir det også roleg, instrumental musikk i house-sjangeren. Albumet blir likevel heilt forskjellig frå det eg brukar å lage, fortel 26åringen vidare.

Dette albumet blir, slik det ser ut i dag, fylt opp med 6 lange låtar, som artisten samanfattar som «spirituell dansemusikk», utan vokal eller trommer.

Om få dagar ser artisten fram til å feriere heime hos ho mor i Kvinnherad. Sjølv om det vert kalla ferie, kjem han til å jobbe med musikken dagleg. På spørsmål om det ikkje vert sjans å høyre Catnip Cloud live i kommunen etter gammalt, er svaret at det hadde vore kjekt.

– Det har jo vore ganske stusseleg i det siste, og eg har ikkje hatt fokus på spelejobbar. Det er ikkje noko eg har prioritert. Men om det dukkar opp eit passande arrangement i framtida, er eg klar. Då slår eg jo to fluger i ein smekk, der eg både får spelt og får kome heim, slår han fast.

… potensielt også på kassett

Under sist spelejobb, ein privat minifestival i Oslo, fekk publikum høyra dei nye låtane. Ein av kompisane til Thorkildsen, som driv eit lite plateselskap, meinte at EP-en burde bli gitt ut på kassett.

– Å gi ut på kassett er jo far out, men det er faktisk ganske mange underground-artistar som sel musikken sin i dette formatet. Eg skal høyra med Jørgen, eg må jo nytta meg av det, det er jo kult, fortel han engasjert vidare.

Det kan dermed bli behov for å leite fram gamle walk-man-ar og kassettspelarar frå kjellarar og loft – særskilt om ein vil lytte til den nyaste EP-en frå Catnip Cloud i siste musikkhype-format.