Avisbesøk frå New Jersey

– Me hadde funne ut at det var ein avisredaksjon i Rosendal, så me spurte ho dama på bokhandelen om kor Grenda hadde kontor, smiler Brett Ainsworth, redaktøren i Retrospect, ei lokalavis for byen Haddonsfield i New Jersey.

Dermed var det duka for ein triveleg samtale mellom avisfolk. Saman med Brett, var kona og styreleiar Susan Ainsworth, samt ein pensjonert journalist Kirsten Ellis. Det var Kirsten som var grunnen til at dei reiste akkurat til Noreg.

Trudde bestemor overdreiv

– Bestemor mi var frå Bergen, og snakka alltid om kor vakkert det var der. Eg har alltid drøymt om å reisa hit. Så var det veninna mi Susan her, som slo fast at det ikkje var noko å nøla med; me reiser!, smiler ho.

Amerikanarane tok snøggbåten frå Bergen til Rosendal. Dei verkar til å trivast godt på Vestlandet, og nyttar høvet til å koma seg ut i naturen. Kirsten starta å trena i mars, for å vera i form til gode gåturar i Noreg.

– Me har vore på Fløyen, og i dag gjekk me Hattebergsdalen. Det er så vakkert her! Eg trudde bestemor mi overdreiv, men det er verkeleg så utruleg vakkert! Og det er så fine folk i Noreg, eg kjenner det er omtrent som å koma heim, fortel Kirsten, som er oppkalla etter Kirsten Flagstad, sidan foreldra hennar var så glad i stemma til den norske operastjerna.

Det vart tid til litt avis-nerding også, i solskinet i Skålagato. Dei to avisredaktørane, Håvard Sætrevik og Brett Ainsworth, hadde mykje å snakka om.

– Me skal jo sjølvsagt jobba litt i morgon sjølv om me er på ferie, for å få ferdig avisa til torsdag, ler Brett og Sue.

To sjølvstendige aviser

Det er kanskje ulike saker dei to avisene skriv om, sidan det er to ulike samfunn som skal speglast, men det er også ein del som er likt. Både gode idrettsprestasjonar av lokale utøvarar og nedlegging av skular var saker som Retrospect-journalistane kunne kjenna att då avisene vart samanlikna.

– Det var litt lettare å driva avis før. No blir alle kjøpt opp av store konsern og hedgefond, og det er mange små aviser som blir lagt ned, fortel Susan.

– Me ser sterke tendensar til ei slik utvikling her i landet også, seier Håvard.

– Me har blitt forsøkt oppkjøpt og pressa ut, men me driv for oss sjølve framleis, og det vil me halda fram med, seier Brett med eit smil.

Det vart eit interessant og triveleg møte mellom to aviser. Sterke krefter i Grenda-redaksjonen har no begynt å pressa Håvard Sætrevik for å få ta ein felles studietur til New Jersey og besøka Retrospect.