Avduka «Egget» med brask og bram

I halv tre-tida natt til onsdag vart biten i puslespelet Egget krana på plass. Torsdag vart verket presentert for av eigarane Hauge Aqua og Herde Kompositt for samarbeidspartnarar og presse.

21 meter høgt, 15 meter breitt og med plass til 100.000 oppdrettslaks på eitt kilo kvar stod «Egget» på kaikanten på industriområdet til Herde i Ølve, og helsa til både dei som kom sjøvegen og til fots.

Båtlast

Gründeren bak Hauge Aqua Solutions, som no skiftar namn til Ovum – latinsk for egg – gjorde det klart for dei kring 200 som var samla i teltet på industriområdet «Egget» er svaret på dei store problema til laksenæringa; lakselus, rømming, forureining og arealeffektivitet.

– Det er laksen det handlar om. Oppdrettslaksen som gir 18 millionar middagar kvar dag, skatteinntekter og eksportinntekter på 85 milliardar i fjor. Talet rømt laks går ned, men likevel talet er likevel mykje større enn talet på villaks, påpeika han til dei frammøtte.

Hauge Aqua og Herde Kompositt hadde sylt opp ein snøggbåt støttespelarar, presse og andre inviterte og frakta dei frå Bergen til Ølve. Herde-sjef Kim Røssland var strålande nøgd med både båttur og seansen i Ølve.

– Egget kom nesten før Herde, og var ein stor, utløysande faktor for at Herde blei noko av. Alle som har heia på oss var med på turen, Innovasjon Norge, bank, kommunen, eg vart rett rørt av å sjå alle. Og så enda båtturen rett inn i resultatet. Dette «Egget» var det me bad om støtte for å få til, og det kan me visa fint fram no, sa Røssland då han fekk ordet.

Rosa tilsette

– Det har vore ei utruleg reise frå det me fekk presentert på eit teiknebrett til det me ser i dag. Då formene kom viste det seg at dei var gigantiske. Utfordringane har vore der. Dette er ein prototype, og løysingane måtte finnast undervegs, påpeika han.

Røssland slo også fast at kompositt er handverk, og fortalte om erfaringa til dei tilsette og leiinga som bedrifta sat med då Herde var i ferd med å etablera seg som bedrift, på fabrikken til Palfinger.

– Utan Hauge Akva, så hadde me kanskje ikkje vore her me er no. Dei har blant anna gitt oss mykje publisitet, og vore med på å leia oss vidare til potensielt mykje anna spennande. Fabrikken var 50 år i fjor. Eitt år etter er me eitt år. I si tid var kommunen med på å etablera fabrikken. Då me 50 år etter trengte hjelp til å etablera oss, så var dei der til å hjelpa, då også, forklarte Røssland.

Han meinte Herde og Hauge fann ein god tone heilt frå starten, og har hatt eit samarbeid tufta på tillit og respekt.

– Det er to bedrifter med beina godt planta på jorda, som begge er heil ved, meinte leiaren.

Røssland nytta også mikrofontida si til å rosa dei tilsette ved fabrikken.

– Dei er verdien vår. Me har ikkje noko produkt å selja utanom vår kompetanse. Me hadde ein stor operasjon natt til onsdag. Eg stod og såg på i halv tre-tida om natta. Alle dei tilsette er der, like blide og positive som om klokka var klokka sju om morgonen når arbeidsdagen vanlegvis startar, rosa han.