Avdekka fleire manglar under kontroll

Resultata av kontrollen vart: 1 anmeldelse, 1 overlastgebyr, 5 bruksforbod, 1 bilbeltegebyr og 4 dekk/kjettinggebyr.

«Vegvesenet jobbar iherdig for å betra tryggleiken til alle trafikantar, og har ein nullvisjon for hardt skadde eller drepne i trafikken. Alle som ferdast på norske veger skal koma trygt fram. Ved å halda igjen tunge og lette køyretøy som har dårleg sikring av last, er overlasta eller har for mykje ting i frontruta, gjer vi det vi kan for å gjera vegen tryggare for alle», skriv Svein Gunnar Vintertun i Vegvesenet i ei pressemelding.

Under ein kontroll på Stripo ved Husnes vart ni lette og seks tunge køyretøy kontrollerte. Det vart funne 12 feil og manglar.

Eitt av vogntoga var for tungt. Det førte til eit overlastgebyr på 13 200,- og avlasting før dei fekk køyra vidare. I tillegg var fire av dekka under lovleg mønsterdjupne, som førte til fire gebyr på 2000,-. Ein dyr affære for sjåføren som må ut med 21 200,-.

«Det er viktig for tryggleiken til alle trafikantar at bremsene verker som dei skal på lette og tunge køyretøy og tilhengarar. Like viktig er det at dekka har rett mønsterdjupne, og at lysa er i orden. Vi er difor dagleg ute og kontrollerer både bremser, dekk og lys på køyretøy og tilhengarar» heiter det i pressemeldinga.

Elles vart desse feil og manglar registrert:

* Eit firma som frakta farleg gods vil verta anmeldt for brot på reglane for transport av farleg gods. Dei hadde ikkje med fraktpapir.

* Ein varebil var overlasta, den fekk bruksforbod og måtte lessa av til lovleg vekt.

* Ein førar måtte parkera tilhengaren på plassen då bilen ikkje hadde lov å trekka så tung hengar.

* Ein førar måtte sikra lasta betre.

* Ein passasjer fekk 1500 kroner i bot for å ikkje bruka bilbelte.