Avdekka fleire brot på arbeidsmiljølova

Arbeidstilsynet fann fem forhold som ikkje var i samsvar med regelverket under tilsyn hos eininga rus og psykiske helsetenester i Kvinnherad kommune.

7. september gjennomførte Arbeidstilsynet eit tilsyn hos eininga rus og psykiske helsetenester i Kvinnherad kommune. Eit besøk med fokus på å kontrollera og bidra til at eininga jobbar systematisk med helse, miljø og sikkerheit for å førebyggja vald og trugslar.

Rettar pålegga

I den åtte sider lange tilsynsrapporten kjem det fram at eininga, som omfattar avdelinga Borgjo, S15 og avdeling for ambulant team, har litt å forbetra. Arbeidstilsynet varslar totalt fem pålegg som dei har gitt kommunen ein frist til 12. januar å betra.

– Vi er kome godt i gang med arbeidet for å retta på det, både i mi eining og overordna. Når det kjem til pålegga så er vi einige i at vi har noko vi må bli betre på. Så er det litt i forhold til opplæring av verneombod vi ikkje er heilt einige i, og her er vi i dialog med Arbeidstilsynet, seier einingsleiar Linn Stene Hellås.

I tillegg til å peika på at verneombodet manglar HMS-opplæring, har Arbeidstilsynet varsla pålegg når det kjem til plan for bedriftshelsetenesta sin bistand i verksemda.

– I tilsynet kunne det ikkje leggjast fram ein bedriftshelseteneste-plan på avdelingsnivå. Dette er brot på arbeidsmiljølova, skriv Arbeidstilsynet og bed kommunen om å laga og senda ein kopi av ein slik plan innan 12. januar.

Eit arbeid som allereie er i gang.

– I og med at vi hadde byta bedriftshelseteneste så var ikkje det på plass, men den planen er no under arbeid, seier Hellås.

Kurs er bestilt

Vidare har Arbeidstilsynet gitt pålegg som går på nødvendig opplæring og øving på førebygging og handtering av vald- og trugselsituasjonar.

– Terma-kurs er gjennomført tidlegare. Det vart opplyst i tilsynet at opplæringa stoppa opp ei tid før pandemien sette ein naturleg stoppar for gjennomføringa av praktiske øvingar. Tilsette fortalde at dei manglar opplæring og øving i førebygging og handtering av vald og trugslar. Dette er brot på arbeidsmiljølova, står det å lesa i rapporten og dei bed kommunen senda inn skriftleg stadfesting på at opplæring og øving er gitt.

Her fortel Hellås at kommunen har bestilt kurs og at det vil skje allereie i desember.

Skriftlege rutinar

Arbeidstilsynet var heller ikkje tilfreds med kommunen si kartlegging og risikovurdering når det kjem til vald, trugslar og uheldige belastningar.

– Kartlegging gjennom vernerunde skjer årleg. Medarbeidarundersøking med 10-faktormodell vert opplevd som meiningsfull av dei tilsette. Men dette er ikkje god nok kartlegging knyt til vald og trugslar, skriv Arbeidstilsynet i rapporten.

Kommunen må difor senda ein kopi av kartlegging og risikovurdering av vald og trugslar om vald som oppfyller eit minimumskrav i forskrifta, samt ein kopi av karlegging og risikovurdering av uheldige belastningar som følgje av kontakt med andre innan 12. januar.

Kommunen fekk også pålegg på manglande rutinar for konflikthandtering.

– Verksemda har ikkje ein eigen rutine for førebygging og handtering av konfliktar. Det vert lagt vekt på at det har vore uro i arbeidsmiljøet, og at tilsette var usikre på korleis dette skulle førebyggjast og handterast. Dette er brot på arbeidsmiljølova, skriv Arbeidstilsynet.

Men sjølv om eininga ikkje hadde skriftlege rutinar å visa fram under tilsynet, seier Hellås at dei har rutinane på plass.

– Konflikthandtering har vi rutinar på, men vi har dei ikkje skriftleg. Og det skal vi ha. Vi har eit kvalitetssystem kor dei skal liggja skriftleg, og det skal vi få på plass. Her får vi hjelp frå personalavdelinga i kommunen, seier Hellås og legg til:

– Det er ting her i rapporten som vi skal ha på plass, og som vi har kome godt i gang med å retta. Det er nye lovverk og endringar heile tida, så det kan vera vi glepp på noko. Difor er det ok med eit tilsyn, og vi brukar det som ei rettleiing.