Aukar prisen i miljøvernet sitt namn

Grunnen til auken er at kontingenten til medlemane i Handelens Miljøfond aukar frå 1 til 2 kroner. På Miljøfondet sine sider skriv dei at dette er eit tiltak for å redusera plastposebruken. Målet er å redusera forbruket til under 40 plastposar per innbyggjar innan 2025.

– Plastforbruket vårt er ein del av både natur- og klimakrisa. I Noreg brukte me over 722 millionar plastposar i fjor, som er 132 posar per innbyggjar. Det er unødvendig mange posar, og no vil handelen bera meir av ansvaret for å redusera forbruket, seier dagleg leiar i Handelens Miljøfond Cecilie Lind på deira nettside.

Effektivt

1. januar 2022 auka Miljøfondet kontigenten frå 50 øre til 1 krone per plastpose. Same året sank forbruket med nær 100 millionar plastposar.

– Då me auka førre gong, såg me at plastposeforbruket gjekk ned. Fleire har byrja å bruka ombruksalternativ som handlenett, og det er den utviklinga me ynskjer å forsterka. Ved å bruka handlenett i butikken og avfallsposar på rull til avfall kan ein husstand kutta plastforbruket sitt vesentleg, forklarer Lind.

Ifylgje undersøkingar som NRK har gjort, må ein etter aukinga no ut med 4 kroner og 25 øre per plastpose i dei fleste matbutikkane.

Handelens Miljøfond skriv også at ein ny auke er planlagt frå 1. januar 2024 frå 2 til 3 kroner.