Auka utanforskap i Sunnhordland

Dette skriv Håvard Lægreid, leiaren i NAV region Sunnhordland, i ei pressemelding.

Arbeidsløysa har vore under to prosent i 30 månadar. I august står 1,1 prosent av arbeidsstyrken heilt ledige i Sunnhordland. Det er ein nedgang på 50 personar i høve førre månad og eksakt same tal personar som same månad året før. Det er framleis låg arbeidsløyse i Vestland, men desse tala syner ikkje heile bilete om arbeidskraftreservar.

Auke i utanforskap

Me ringte Håvard Lægreid for å høyra kva som er skilnaden på arbeidsløyse og utanforskap.

– Ordinært arbeidslause definerer me som dei som kunne ha teke ein jobb i morgon. I utanforskap reknar me dei som ikkje er klare for ein jobb, anten fordi dei er sjuke, manglar utdanning eller språk, eller dei rett og slett ikkje vil, forklarar han.

NAV har dei siste åra produsert ein analyse av utanforskapen frå arbeidslivet, der ein ser personar som ikkje er pensjonerte, ikkje er i utdanning, ikkje er sjølvstendig næringsdrivande eller har ein arbeidsplass å gå til. Tala for desember 2023 syner ei auke i utanforskap frå året før. 1 av 5 personar i Sunnhordland, eller 20,1 prosent, står utanfor arbeidslivet – anten med eller utan ei yting frå NAV.

Tala speglar det nasjonale snittet, medan Vestland elles er fylket med lågast tal på utanforskap. Sunnhordlandsregionen dreg med andre ord opp talet på utanforskap i fylket.

– Ei av årsakene til auken, er tilflytting av flyktningar frå Ukraina. Men det er også andre grunnar. Oppgangen tek me på største alvor, og me lyt jobba godt på tvers av sektorar for å sikra at alle som vil og kan, får ein sjanse i arbeidslivet», seier Håvard Lægreid.

Litt betre for unge

Av alle i aldersgruppa 20-66 som står utanfor arbeidslivet, mottek omlag to tredjedelar ei yting frå NAV, medan den siste tredjedelen står utan yting og utanfor arbeidslivet.

Blant unge (20-29 år) er det 18,6 prosent som står utanfor. Dette utgjer ein liten nedgang, mot 18,9 i fjor. Halvparten av desse mottek ei yting frå NAV, medan den andre halvparten ikkje mottek noko.

– Me syns det er positivt at fleire av dei unge som står utanfor, no mottek ei yting frå NAV, og me vonar dette gjer dei betre posisjonert i høve å kome seg i arbeid, seier Lægreid.

Tal frå Kvinnherad viser også ei lita auke i tal på folk som står i utanforskap. Men marknadsansvarleg i NAV Sunnhordland Chris-André Elvik åtvarar mot å leggja for mykje vekt på tal i kvar enkelt kommune:

– Ein skal vera litt forsiktig med å sjå for detaljert på lokale tal, sidan små hendingar kan gje store utslag. Eit bilete av ein trend får ein først når ein kjem opp på regionale og nasjonale tal, påpeikar han.