Auka aktivitet blant unge på treningssenteret

Etter at låsen til treningssenteret i Rosendal blei øydelagd, og aldersgrensa for å trene der blei satt ned til 15 år med verje, har talet barn og unge som trenar der ulovleg auka. Leiarane har opplevd at barn ned 13 årsalderen har vore der, sjølv om aldersgrensa for å trene på treningssenteret aleine er 16 år.

Strenge konsekvensar

Konsekvensane av at barn og unge går på treningssenteret utan lov og verje er at aldersgrensa blir satt opp. Fleire brukarar synes dette er dumt. Det gjeld spesielt 16 åringane som er nye på treningssenteret.

Dei meinte at å auke aldersgrensa vil gå utover alle. Fleire vaksne har også kome med tilbakemeldingar om barn og unge som brukar treningssenteret.

– Det er forståeleg at unge ynskjer eit sted å være i aktivitet. Det er eit dårleg tilbod for dette her i Kvinnherad. Vaksne har derimot endå færre tilbod. Det er synd at gjengar med barn og unge tek så mykje plass, dette er frustrerande for vaksne som ynskjer å trena der, seier ein brukar av treningssenteret som ynskjer å vera anonym.

Geir Ove Fosse, leiar i Rosendal Trim, fortel at treningssenteret blir drive på dugnad, og at det dermed er vanskeleg å kontrollere kven som er der.

– Vi ynskjer at alle skal få være der å trena, men grensa må gå ein stad. Vi har ganske like aldersgrenser som Skyfitness og TrimX på Husnes og andre større nasjonale kjeder. Sidan vårt treningssenter er drive av frivillige, må vi være litt strenge på reglane.

Positiv til forbetring

Tidlegare hadde treningssenteret aldersgrense som sa at ein kunne trene der frå det året ein fylte 16 år.

– Ein del unge hadde lyst til å begynne litt før, og det er jo bra for vi har lyst til at ungdommane skal trene hos oss. Då innførte vi eit nytt medlemskap som sa at du kunne trene det året du fylte 15 år, men då måtte du trene med ein forelder. Dette blei ein form for introduksjonsmedlemskap, fortel han.

Etter at aldersgrensa blei satt ned til 15 år med verje, har fleire barn og unge vært der og trent i for ung alder.

– Mange tenkjer nok at det ikkje er så viktig å ha med seg ein vaksen. Ein anna grunn kan være at døra vår ikkje har verka, så alle har kunne gått inn som dei ville.

Fosse er positiv til forbetring, og meina det hjelpte å reparere låsen til døra. Leiaren av Rosendal turnlag har også vore og snakka med klassane dette gjeld.

– Dette er eit problem som har blitt betre etter at vi informerte klassane, og var tydlege på at ein må følgje reglane, fortel han.

– Vi er utruleg glade for at barn og unge ynskjer å trene, men i så ung alder er det betre med anna aktivitet.

Må følge reglane

– Dette har ikkje vore eit problem i så stor grad før, men i vår trente ganske mange unge utan verje, av dei som var blitt 15 år. Ein del i klassa som var endå yngre begynte også å prøve seg litt. Det er nytt at så mange har prøvd seg, men det har nok samanheng med at døra har vore øydelagd, fortel Fosse.

– Vi ynskjer jo at folk skal bruke treningssenteret og at ungdommar skal vera der, men dei må ha medlemskap, og dei må ha med seg foreldra sine om dei er 15 år, informerer han vidare.

Fosse seier at dei er veldig glade for at alle vil trena der og dei ynskjer alle velkomne, men det er ein ting han meiner er viktig å hugsa på.

– Dei må fylgje reglane med at dei ventar til dei er gamle nok og har eit medlemskap når dei er der og trenar. Viss det er noko dei lurar på så må dei gjerne ta kontakt så skal vi hjelp dei, avsluttar han.

Tekst: Kaylah Bermillo Stensletten og Ebba Hermann Fossli