Åtvarar om bruk av berøringsskjerm i trafikken

Trygg Trafikk har no kartlagt bruken av skjerm i bil, og meiner i ei pressemelding at funna er oppsiktsvekkande.

«Når du køyrer ein moderne bil, er du heilt avhengig av berøringsskjermar. Derfor er det viktig at vi no har dokumentert kor mykje merksemd dei ulike handlingane stel av oss» skriv Ann-Helen Hansen i Trygg Trafikk i ei pressemelding.

Køyrer i blinde

I studia, som er gjennomført av SINTEF i samarbeid med Nord Universitet, kjem det nemleg fram at trykking på berøringsskjerm under bilkøyring er langt meir øydeleggande for merksemda di enn kva dei fleste kanskje trur.

44 personar var med i studia, der dei skulle utføra ulike oppgåver på skjermen i bilen medan dei køyrde. Eit såkalla blikkpunktkamera blei brukt for å registrera korleis merksemda til sjåføren blei fordelt. Personane skulle mellom anna endra temperatur, søka på musikk og radiokanalar, samt tasta inn ei adresse i navigasjonssystemet.

I pressemeldinga kan ein lesa at det heilt klart var sistnemnde som var verst.

«Oppgåva krev at føraren i sum ser på skjermen i snitt heile 15,7 sekundar for å fullføra tastinga av adressa», skriv Trygg Trafikk.

Val av musikk og radiokanal tok 10-11 sekundar, medan det i snitt tok føraren 3,4 sekundar å endra temperatur.

I blinde

«I den tida er du ikkje merksam som sjåfør, du brukar tida på skjermen i staden for trafikken. Og når du tar blikket vekk frå trafikken, køyrer du i praksis i blinde. Så jo lengre tid oppgåva tar, jo lengre har du køyrd med bind for augo» slår Hansen fast.

Skal du styra musikken i to sekundar medan du køyrer i 63 km/t har du i teorien køyrd 30 meter i blinde.

Trygg Trafikk får støtte frå forsikringsselskapet Fremtind, som i pressemeldinga fortel at dei har sett ein stor auke i tal bilskadar dei siste åra, og meiner at ei av hovudårsakene til dette er uoppmerksame sjåførar.