Åtvarar mot oppsøkande handverkarar
A-krimsenteret i Vestland er kjend med at useriøse og oppsøkande handverkarar er i regionen, og dei åtvarar sterkt mot å ta i mot slike tilbod.
Dette er folk som dreg frå hus til hus og tilbyr ulike vedlikehaldstenester som blant anna måling, spyling av tak, snikkararbeid, vasking og skifting av takstein. Arbeidet vert gjerne utført av ufaglærte, og då er ein ikkje sikra god kvalitet på arbeidet som blir gjort, skriv a-krimsenteret i ei pressemelding.
– Me ser at desse personane spesielt oppsøkjer eldre personar, og fleire kjenner seg kanskje pressa til å ta i mot tilboda. Det vert blant anna argumentert med at det er nedsette prisar på tenestene berre i dag. Aktørane ber gjerne om forskotsbetaling, og kan bli veldig pågåande dersom ein prøver å halda tilbake betaling, seier senterleiar for a-krimsenteret i Vestland Ove Boga i pressemeldinga.
Annonse
- Når omreisande handverkarar tilbyr tenester dreier det seg svært ofte om svart arbeid. Då misser forbrukarane sine rettar. Som regel reiser også handverkarane ganske raskt vidare, og det er vanskeleg å finne dei att. Her er det ingen reklamasjonsrett ein kan nytta seg av, fortset han.
Sjekkliste
Dersom ein blir tilbydd slike tenester er det fyrst og fremst lurt å sjekka om dei er registrerte i Brønnøysundsregisteret. Dette kan sjekkast på brreg.no. Dersom dei skulle vera registrerte oppfordrar a-krimsenteret likevel til å gjera fleire undersøkingar. Mellom anna:
-Be firmaet om å senda ein skatteattest via altinn.no, for å sjå om firmaet har betalt eller skuldar skatt og avgift.
Annonse
-Skriv avtale på arbeidet som skal bli utført og prisen du skal betala.
-For å unngå arbeidsgjevaransvar er det sikrast å engasjera eit firma som har HMS-ansvar og forsikring for sine tilsette. Blir du som oppdragsgjevar tilsett for å vera arbeidsgjevar, kan du risikera å bli erstatningsansvarleg for skadar som fylgje av ei arbeidsulukke i din heim.
Avslutningsvis ber dei om vera spesielt merksame på handverkarar som legg enkle reklamelappar i postkassen, ber om forskotsbetaling, tilbyr å hjelpa til med Vipps eller nettbank, gjev uvanleg lange garantiar eller køyrer rundt med sletne varebilar utan logo.
