Åtvarar mot naivitet og uærlege hensikter

– Vi kan ikkje vera naive. Når folk er i ein utsett situasjon, så er det mange som vil utnytta det. Det sa politioverbetjent Torgeir Fosse då han orienterte kommunestyret om flyktningstraumen frå Ukraina.

I tillegg til at to vedtakssaker om Ukraina stod på saklista torsdag, fekk kommunestyret også ei orientering om flyktningkrisa. Der deltok politioverbetjent Torgeir Fosse frå Kvinnherad politistasjon.

– Politiet ynskjer ikkje at det vert gjort private initiativ for å henta flyktningar. Vi ynskjer at dette skjer i ordna former, innleia han.

Fosse åtvara også mot å vera naive, og viste til at flyktningane, spesielt kvinner og barn, kan bli utnytta av kriminelle og menneskehandlarar.

– Når folk er i ein utsett situasjon, så er det mange som vil utnytta det. Det er viktig å ha oversikt over kven som kjem, for blant dei kan det òg vera folk med uærlege hensikter, understreka han.

Tuberkulose

Knut Johannes Helvik (H) spurde om politiet har vore i kontakt med dei kvinnheringane som har henta flyktningar på eige initiativ.

– Ja, det har vi. Men om vi klarar å fanga opp alle, veit vi ikkje, svarte Fosse.

– Det er prisverdig det som blir gjort gjennom private initiativ, meinte Synnøve Solbakken (Ap).

Ho minna elles om at det blant flyktningane kan vera einskilde som ikkje er vaksinerte mot til dømes meslingar og tuberkulose.

– Vi er veldig oppmerksame på det Solbakken tek opp, men det er ventetid på tuberkulosesjekk. Registrering er heile clouet. Då går alt så mykje lettare, og vi får det i rette former, sa kommunedirektør Ragnhild Bjerkvik.

Torgils Våge (Sp) undra kva reglar som gjeld for dei som reiser til familie i Norge.

– Uansett årsak så må dei registrera seg, sjølv om dei har familie å bu hjå, opplyste Fosse.

– Registrering gjeld òg kjæledyr. Det er ikkje berre å henta ein hund eller ein katt, supplerte Bjerkvik.

Til Kokstad

Øyvind Hardeland (Ap) tok opp eit tenkt scenario der private hentar hundre flyktningar i buss.

– Dette må vi tenka gjennom. Vi må ha styring på dette, elles er eg redd det blir mange taparar, sa han.

Torgeir Fosse var heilt samd.

– Dei som kjem skal til Kokstad (Scandic-hotellet) for å registrera seg. Der er det eit mottaksapparat, og det bør vi nytta oss av. Dei som køyrer buss for å henta folk, risikerer å gjera noko ulovleg. Viss dei som kjem ikkje er flyktningar, så kan ein gjera seg skuldig i menneskehandel, noko som er svært alvorleg, slo han fast.