Åtvarar hundeeigarar om giftig sopp

Soppsesongen varierer frå år til år, men enkelte stader startar den allereie i juni og vert avslutta så seint som i desember. Kvart år får forsikringsselskapet Agria inn fleire skademeldingar som gjeld hundar som blir forgifta av sopp. Dei fleste blir dårlege ein kort periode, men i verste fall kan hunden døy.

Agria og veterinær Sara Solheim oppmodar difor alle hundeeigarar til å sjå opp for giftig sopp og vera merksame på symptoma.

« Hugs at giftig sopp ikkje berre finst i skogen, men også i hagar og langs vegen. Dersom du mistenkjer at hunden din har fått i seg giftig sopp, er det viktig å ta den med til veterinæren med ein gong. For at veterinæren raskt kan setja i gang med rett behandling, er det viktig å vita kva slags sopp hunden har fått i seg, ettersom behandlingsmetode og oppfølging kan variera for dei ulike soppforgiftingane. Prøv også å merka deg korleis det ser ut der soppen veks», heiter det i ei pressemelding.

Væske

Om det er kort tid sidan hunden åt soppen, kan veterinæren gje hunden brekkmiddel for å forsøka å få opp mest mogleg. Medisinsk kol vil ofte bli gitt for å prøva å binda giftstoffa og dermed hindra at desse vert tekne opp i kroppen. Hunden får også ofte væskebehandling for å hjelpa kroppen og prøva å unngå kroniske skader.

Symptoma er ulike avhengig av kva og kor mye giftig sopp hunden har fått i seg.

– Nokre symptom kjem ganske raskt etter inntak, andre symptom kan fyrst visa seg etter nokre dagar, fortel Solheim i pressemeldinga.