Åtvara mot nettsvindel

Eldrerådet i Kvinnherad har alle innbyggjarar over 65 år som målgruppe. Leiaren Arne Presthus tok turen til Kommunestyret førre torsdag for å presentera arbeidet som rådet gjer. Men, som han sa:

– Vi har mykje større ambisjonar enn vi har tid til, men vi prøver så godt vi kan.

Slik Presthus ser det, er det største problemet for eldre no om dagen den omfattande nettsvindelen. Presthus oppmoda difor kommunen til å arrangera kurs om teamet, for å rettleia både eldre og unge.

– Du kan få melding frå noko som tilsynelatande er EasyPark eller Telenor om at du har betalt for mykje, og at du må trykkja på ei lenke for å få pengane tilbake. Slett den e-posten, elles er du fort 50.000 kroner fattigare, åtvara Presthus.

Middagar

Elles trekte han fram saka om fylkestannlegekontoret i Rosendal, samt ynsket om å ha pårørandeutval på alle aldersheimane. Førebels er det berre i Rosendal eit slikt utval er etablert.

– Det har ikkje vore mogleg å få til andre stader så langt, konstaterte han.

Ei anna viktig sak, som har vore mykje omtalt dei siste åra, er forslaget om at heimebuande eldre skal kunne få kjøpa seg ferdige middagar og få levert på døra.

– Dette har Eldrerådet jobba med over lang tid, men det har vist seg vanskeleg å få til. Vi arbeidde sterkt mot kommunen for å få dei til å vera med, og deretter vart det sendt ut førespurnad til alle som ein kunne tenkja seg ville produsera maten. Det vart også sett opp ein møtedato. Eitt selskap meldte si interesse, men ingen møtte. Då vart vi litt skuffa, sa Arne Presthus.

– Men vi har ikkje gitt opp. Kanskje er det noko for Frivilligsentralen?, analyserte han.

Fleire sjukeheimsplassar

Per Harald Havnen Löfgren Johansen (Ap) hadde fyrste spørsmål til Presthus.

– Kva er det som gjer det vanleg for eldre å bu heime i dag, i staden for å koma seg på pleieheim?

– Eg trur vi treng fleire sjukeheimsplassar. Det som skil dei som bur heime frå dei som er på sjukeheim, er at dei ikkje har fått plass, svarte Arne Presthus.

Stine Hatteberg (H) undra kvifor det ikkje er kome pårørandeutval på Husnes enno.

– Eg jobbar sjølv på Rosendalstunet, og det fungerer godt der, opplyste ho.

Arne Presthus hadde ikkje noko umiddelbart svar, men trur kanskje det har med den stadige utskiftinga av pårørande på aldersheimane, i tillegg til at folk generelt er blitt redde for å ta på seg ulike oppgåver.

Eldrerådet består elles av Grethe Brundtland, Reidun Marie Fjelland Ludvigsen, Torgils Våge og Svein Åge Vangdal. Sistnemnde er oppnemnt av Kommunestyret.