Astri og Bente inviterer til ein livsviktig marsj

Astri Måkestad og venninna Bente Haugen inviterer alle i Kvinnherad, store som små, til ein Rosa sløyfe-marsj fredag 28. oktober. Det var også dei som tok initiativet til det opne møtet om kreftomsorg i kommunen i september.

– Me gir oss ikkje, seier Astri på telefon til Grenda og legg til.

– Me ynskjer å arrangere denne marsjen for å setja enno meir fokus på kreftomsorga, forsking på brystkreft og dette med tidleg oppdaging, som er årets tema.

– Heilt naudsynt med betre kreftomsorg

Marsjen er i samband med Rosa sløyfe-aksjonen, ein internasjonal folkerørsle som Kreftforeningen og Brystkreftforeningen står saman om, og som vert arrangert i oktober kvart år. Det lokale arrangementet til Astri og Bente er lagt til Rosendal.

– Sjølv om marsjen er i Rosendal, er alle i heile Kvinnherad invitert. Me håpar unge som eldre vil delta, og løypa er planlagt slik at både barnevogner og rullestolar kan bli med, informerer ho.

Song og appell

Arrangementet byrjar i den gamle banken i Rosendal sentrum klokka 17.00, der dei som ønskjer kan vera med på ei felles oppvarming. Deretter går vegen vidare til Steinparken og Vangsaga, der Capo-jentene skal syngja og Astri skal halda appell om det å støtta kreftsaka og kor viktig det er å undersøkja seg.

– Det vert ei lita markering i forhold til andre markeringar rundt om i landet, men eg håpar og trur det blir ein fin dag og at mange ønskjer å delta. Eg og Bente skal også ha stand på Varehuset Rosendal tidlegare på dagen, der me skal selja rosa sløyfe-effektar. Det blir ikkje noko startkontingent i samband med marsjen, men eg håpar at folk vil kjøpa effektar og kanskje betala litt ekstra, seier Astri.

«Målet med aksjonen er å vise solidaritet med brystkreftrammede, spre informasjon og øke kunnskapen om brystkreft, i tillegg til å støtte livsviktig forskning på brystkreft.», skriv Kreftforeningen om aksjonen på si nettside.

Vart likevel råka

Rosa sløyfe-aksjonen setter i år, som i fjor, søkjelyset på tidleg oppdaging av brystkreft fordi det reddar liv, noko Astri meiner er svært viktig å støtta. Ho har sjølv vore råka av brystkreft.

– Me har jo til dømes mammografiprogrammet som reddar liv ved å oppdaga brystkreft tidleg. Likevel vel ein av fire kvinner å ikkje møta opp til undersøkinga. Eg meiner det er skumle tal. Det er lett å tenkja at det ikkje vil skje meg, og i alle fall for dei som ikkje har det i familien, men eg hadde heller ikkje nokon i familien som hadde hatt det, men eg vart råka likevel. Hadde ikkje eg gått på undersøkinga hadde utfallet moglegvis vore annleis, i verste fall kunne eg døydd. Dette er kjempeviktig å støtta!, fastslår Astri.

Livreddande undersøking

Inntektene frå aksjonen går til forsking på brystkreft slik at fleire kan overleva og at fleire får best mogleg livskvalitet etter brystkreftbehandling, står det på Kreftforeningen si nettside.