– Arvid er ei legende

Laurdag morgon vart det kjent at dugnadsmannen og fotballentusiasten Arvid Nes er død, 76 år gamal. Grenda har snakka med nokre personar som hadde mykje med Arvid å gjera, og som kjem til å sakna han sterkt.

Tidlegare Eliteseriespelar og cupvinnar Johnny Furdal frå Omvikdalen har fått god hjelp og støtte av Arvid Nes sidan han som liten gut nytta kvar anledning til å trena.

– Fyrst og fremst vil eg kondolera mykje til familien. Det var utruleg trist å høyra nyhendet. Arvid er jo ei legende og ei stor eldsjel, som har lagt ned mange fleire dugnadstimar enn alle andre i Kvinnherad til saman. Eg snakka med han sist for nokre veker sidan. Då ville han at eg skulle ta med meg nokre mini-mål til Rosendal, noko som igjen viser at han alltid var oppteken av at barn og unge skulle ha gode tilhøve for å driva med idrett. Han var ein stor mann, seier Furdal.

Arvid Nes er død

Tok ansvar

Tidlegare ambassadør Ingvard Havnen har følgd Rosendal Turnlag gjennom alle år, også då han jobba utanlands. No er han styremedlem i laget.

– Dette er eit stort tap for Rosendal Turnlag. Han har lagt ned ein enorm innsats for laget og ikkje minst for fotballen, som han levde og ånda for. Innsatsen hans har vore heilt uvurderleg. No til veka skal det vera Tine fotballskule i Rosendal, og det spørst om det hadde vore ein slik skule her om det ikkje var for Arvid. Han tok ansvar på alle område i lagsdrifta og ordna opp. At Arvid er borte, er eit stort tap for Rosendal Turnlag generelt og fotballen spesielt, fortel Havnen.

Ville det beste

Jostein Hatteberg har vore styreleiar i Rosendal Turnlag i mange år, og såleis jobba tett med Arvid Nes.

– Arvid var ein entusiast som stilte på nesten alle fotballkampar i mange år. Det var nesten rart kvar gong vi kom på stadion og han ikkje var der. Arvid utgjorde ein stor del av identiteten til Rosendal Turnlag, seier han.

Jostein Hatteberg snakka seinast med Arvid på telefon torsdag kveld. Sidan han visste at Arvid var alvorleg sjuk, sendte han ei oppmuntringsmelding om at kommunestyret same dag hadde vedteke å opprusta kunstgrasbanen i Rosendal med gummigranulat. Arvid har nemleg ivra sterkt for at banen må vølast snarleg.

Men då ringte Arvid opp igjen, og Jostein Hatteberg forklarte at han håpa meldinga muntra opp. «Ja, det gjer den verkeleg», svarte eldsjela frå senga på Haugesund sjukehus.

– Arvid har hatt stor betydning for laget og vil bli sårt sakna. Arvid var dessutan ein veldig fin person som berre ville det beste for ungdomane og laget som heilskap. Han har betydd enormt mykje for alle aldersgrupper i Turnlaget.

Godviljen sjølv

Varaordførar Leif Sverre Enes har også lang erfaring frå Turnlaget, ikkje minst som trenar for A-laget i fleire periodar.

– Det vert sagt at ingen er uerstattelege, men Arvid Nes er den fyrste eg kjem på som nærast er uerstatteleg. Det finst sikkert maken som han, men neppe mange. Engasjementet hans varte over så lang tid, det er det som er det fantastiske, seier Enes.

Han fortel at han har hatt kolossalt mykje med Arvid å gjera opp gjennom åra, og i periodar snakkast dei omtrent dagleg. Til dømes når Arvid hadde idrettslege saker han ynska politikarane skulle ta tak i.

– Han var flink til å få folk med seg, og tok ikkje alltid eit «nei» for eit «nei». Sa du «eg får sjå» eller «kanskje», så tok han det som «ja», humrar Leif Sverre Enes.

– Han levde og ånda for breiddefotballen og for ungdomane. Han var godviljen sjølv, og stilte alltid opp. Han viste eit utruleg engasjement for alle i klubben. Eg kjem til å sakna Arvid, han var ein fantastisk fin fyr, seier Enes.