Årsnes taper mot Jondal – og Ranavik nesten like stor

Ferjestatistikken for 2024 til og med august er interessant lesnad. Når det gjeld «konkurransen» mellom Gjermundshamn-Varaldsøy-Årsnes og Jondal-Tørvikbygd, ser vi at fyrstnemnde har gått ned med nesten 9.000 køyretøy (rekna i PBE=personbileiningar). Sambandet noterte seg for vel 242.000 PBE frå januar til august, mot 251.000 i fjor. Det må også nemnast at det er kravd inn 6,4 millionar kroner i bompengar hittil i år. Ikkje minst må vi hugsa at den nordlegaste ferjeruta i Kvinnherad har vore ekstremt plaga med kanselleringar.

Krokatunellen

Jondal-Tørvikbygd har på si side vakse med 5.000 køyretøy, og står no med 320.000 reisande i år. Dermed har dette sambandet transportert cirka 78.000 fleire køyretøy enn Gjermundshamn-Varaldsøy-Årsnes i år. Det er ikkje så lenge sidan sistnemnde var størst, men vegarbeidet i Mauranger har nok betydd svært mykje for utviklinga. I tillegg har Jondal-Tørvikbygd fått ei ekstraferje i sommarsesongen, dessutan har dei ikkje bompengar der.

Men i sommar vart Krokatunellen opna og vegprosjektet avslutta. Det store spørsmålet er kva dette får å seia for ferjene. Førebels er det for tidleg å konkludera, men ein kan i alle fall merka seg at Jondal-Tørvikbygd hadde ein nedgang på heile 5.142 i august. Dette har likevel ikkje gitt seg utslag i auke lenger ute i fjorden, for Gjermundshamn-Varaldsøy-Årsnes registrerte ein reduksjon på 216.

Nesten størst

Dei siste par åra har det vore ein sterk tendens til at Ranavik-Skjersholmane nærmar seg å bli størst i Kvinnherad. I fjor låg dette sambandet 36.000 bak Gjermundshamn-Varaldsøy-Årsnes. Per august er skilnaden berre på 11.000, etter at strekninga mellom Kvinnherad og Stord har auka med 16.624.

Utåker-Matre-Skånevik har gått ned med vel 3.200 i år, og ligg no i underkant av 70.000 PBE. Fjelbergruta har hatt ein dårleg sommar, og må notera seg ein minus på 1.784 etter åtte månader. Totalen er dermed på 26.320.

Komplett statistikk finn de i papiravisa og e-avisa.