Årsnes aukar meir enn Jondal

Dei fem fyrste månadane av 2017 har vore svært gode for ferjesambandet Årsnes-Varaldsøy-Gjermundshamn.

Etter at Jondal-Tørvikbygd tok innpå gjennom store deler av 2016, har no Årsnes-Varaldsøy-Gjermundshamn sementert posisjonen som det største sambandet i regionen. I perioden januar-mai reiste 97.379 bilar denne vegen, noko som er 5,7% meir enn året før. For Jondal-Tørvikbygd er tala 74.794 og ein auke på 3,3%.

Det tredje største sambandet er Ranavik-Skjersholmane. Her var det 62.084 bilar som tok Norled si ferje dei fem fyrste månadane, ein vekst på 3,9%. Utåker-Matre-Skjersholmane må på si side finna seg i ein nedgang på 4,0%. Fjelbergruta har ikkje hatt noko god utvikling dei siste åra, men det har snudd så langt i 2017. Ein auke på 3,6% bilar om bord MF «Sveio» let seg høyra.

 

Fleire el-bilar

Vi tek også med tala for Kvanndal-Utne og Kinsarvik-Utne, som begge har ein formidabel vekst. Årsaka er etter alle solemerke at vegen mellom Tyssedal og Kinsarvik har vore stengt i lange periodar grunna det store vegprosjektet der inne.

Statistikken for gjenståande bilar viser ein overraskande stor auke på fleire samband. På Årsnes-Varaldsøy-Gjermundshamn har det stått att heile 679 bilar hittil, mot 253 same tid for eitt år sidan.

Også oversikten over el-bilar er interessant lesnad. Mange på Halsnøy har kjøpt seg slikt køyretøy, så det er ikkje uventa at Ranavik-Skjersholmane dominerer fullstendig i tabellen. På sambandet er det registrert 3.424 el-bilar hittil i år, medan talet i fjor var på 2.698.