Arrangerte snikkerverkstad på Husnes

Her kunne ein få bygga seg sin eigen båt eller ein fuglekasse, det vart også servert både pølse og saft til dei som ville ha.

Ufarleggjera

- Byggern har eit prosjekt gåande som heiter sløydmillionen, der alle som har eit byggeprosjekt som borna er ein stor del av, kan søkja om støtte til. Dette ville me markera her lokalt på noko vis, og ideen om ein slik dag har lege i tankane lenge, fortel Hazel Ann Raudstein, som var ein av mange tilsette på arbeid denne dagen for å sørga for at alt gjekk for seg så knirkefritt som mogeleg.

- Me håpar at dette er med på å inspirera folk til å ta med borna på små og store snikkarprosjekt, lar dei få bli kjende med ulike verktøy og ufarleggjera det litt. Kanskje er det fleire spirande snikkarar her i dag, som får augo opp for gleda ved å skapa noko, fortel ho vidare.

Populært

Det var allereie full aktivitet då Grenda tok turen innom. Lyden av titals hamrar ljoma i veggane, og gjennom larmen kunne ein også høyra både barnelatter og livleg prat. Kakofonien til tross, både store og små hadde fullt fokus på dei små prosjekta sine.

- Det er veldig kjekt, om enn litt høglydt, ler småbarnsmor Hanna Kjærland, som tok turen saman med mann, dotter og tantebarn.

Det verka som at fuglekassane var mest populære blant dei frammøtte.

- Me ynskte helst å laga fuglekassar, då det er noko som er viktig å ha hengande ute, men det var litt lite material til det. Dermed enda me opp med båt i staden for, forklarer ho.

- Men det kan jo bli kjekt å leika med det også, seier ho håpefullt.

Gjer det sjølv

Byggern ynskjer å oppmuntra born og unge til å læra seg å snikra, slik at fleire kan klara å gjera ting sjølve, trass i at sløyd stadig vert meir nedprioritert i skulen, skriv dei på sidene sine.

- Me ynskjer jo å gjera folk oppmerksam på prosjektet, og håpar at det inspirerer folk, forklarer Raudstein.

- Det blir nok heller ikkje siste gongen me arrangerer noko slikt. Det kostar så lite, og gjev så mykje, og det er så koseleg å sjå alle borna som kjem hit med hamrane sine, klare til å setja i gong, avsluttar ho.