Årets TV-aksjon går til Barnekreftforeningen
Familiar med eit kreftsjukt barn møter ein vanskeleg kvardag. Målet med TV-aksjonen er at familiane skal få eit hus å samlast i nær sjukehuset, så dei slepp å verta splitta.
– Eg har høyrt om foreldre som måtte vera borte frå heimen og familien sin i vekesvis, fordi dei skal følgja det sjuke barnet. Resten av familien mister den daglege kontakten, ikkje berre med den som er sjuk, men også med ein forelder.
Dette fortel Anja Thunold i Kvinnherad Frivilligsentral. Ho er glad for at det er nettopp barnekreftforeininga som er mottakar av årets TV-aksjon, som blir arrangert sundag 20. oktober. Foreininga vil at Noreg skal følgja dømet til Sverige og Danmark, og skaffa husvære nær sjukehusa i dei største norske byane. Desse husværa skal kunne brukast av familiane til kreftsjuke barn i dei periodane barnet må vera på sjukehuset.
Annonse
– Familiane treng å få vera samla. Dei treng å få fleire gode stunder i ei vond tid, seier Thunold, som er i full gang med å organisera årets bøssebæring.
Klare for årets viktigaste gåtur
Kommunekomitéen til TV-aksjonen i Kvinnherad møttest måndag i Frivilligsentralen og planla aktivitetar knytt til den årlege tradisjonen. TV-aksjonen fyller 50 år i år, og det er framleis bøssebæring som er hjartet i aksjonen, fortel Anja Thunold.
– Ein svært stor del av pengane som kjem inn til aksjonen kjem framleis via bøssene, så den delen av aksjonen er utruleg viktig.
Annonse
Ordførar Vegard Bjørnevik er med i kommunekomitéen, og har god erfaring med bøssebæring.
– Eg vil sterkt oppfordra til å bli med på årets viktigaste tur. Det er for ei viktig sak, god trim, og det er også sosialt. Kvinnheringane sit nærmast og ventar på at bøssebærarane skal koma og ringja på, ein blir svært godt motteken, fortel han.
Open dag i Kvinnherad Arena
Bente Nilsen frå Frivilligsentralen fortel at det er mange bøssebærarar og rodeleiarar som går igjen frå år til år, men at ein alltid har bruk for nye.
– Me treng folk, både nye og «gamle», i heile kommunen. Berre å registrera seg på TV-aksjonen, eller ta kontakt med oss i Frivilligsentralen, seier ho.
Komitéen har tru på at pengane går til ei sak som vil engasjera folk.
Annonse
– Dette er nok ei god sak, mellom anna for barnefamiliar. Kanskje FAU rundt omkring kan hiva seg rundt og bli med? Seier Eva Refvik, som representerer Oppvekstsektoren.
Ved bordet sit også Daidalos Dahle, og planlegg aktivitetar dei skal ha i Kvinnherad Arena tilknytt årets TV-aksjon.
– Det blir ope hus hjå oss fredag 18. oktober. Kjekke aktivitetar, og kafésal der inntekta sjølvsagt går til TV-aksjonen, seier han.
