Årets spelemidlar er tildelt
24. mai vart det kjend kven som får tildelt ein skjerv av spelemidlane til anlegg for idrett, fysisk aktivitet og friluftsliv.
Publisert
Vestland fylkeskommune fekk i år 236 millionar frå Kultur- og likestillingsdepartementet. I tillegg gjekk om lag 10 millionar i renter og inndregne midlar frå 2021 inn i denne potten.
Vestland er fylket som har lengst ventetid for å få tildelt spelemidlar. I år er ventetida estimert til 3,71 år, noko som i praksis tyder at søkjarane må vente nær fire år for å få midlar.
Annonse
Kvinnherad-tildelingar
Desse søkjarane frå Kvinnherad har no fått tildelt sin skjerv av potten:
Rosendal Rideklubb får 503.000 kroner til utandørs ridebane med lys. Kvinnherad kommune får 750.000 kroner til tursti rundt Hattebergfossen, 168.000 kroner til sanitæranlegg i Borvika, og 660.000 kroner til dagsturhytta ved Nautavatnet. Herøysund bygdelag får tildelt 267.000 kroner til Herøysund kajakknaust. Den største potten, på 1 million går til Hatlestrand bygdelag, til arbeidet med Hatlestrandløypo.
Av nærmiljøanlegg har Rosendal idretts- og fritidspark fått tildelt 135.000 kroner til lys, og Kvinnherad kommune har fått tildelt 390.000 kroner til minikunstgrasbane ved Halsnøy skule.
Annonse
Vestland fylkeskommune fekk inn søknadar for til saman 966 millionar.
– Då seier det seg sjølv at det er mange som ikkje får pengar i denne runden, seier Stian Davies, leiar for hovudutval for kultur, idrett og integrering til Vestland fylkeskommune.
