Isolerte: Familien Maria Santiago, Mateo Ventura Santiago Saghaug og Espen T. Saghaug var isolert i ti dagar etter koronasmitte.

Året i bilete

Håvard Sætrevik
Redaktør/Grenda
Publisert Sist oppdatert

Året som gjekk baud på svært ulike reportasjar og bilete i Grenda. Her kjem eit lite utval av augeblikka som vart fanga gjennom linsene våre.

Landbruksoppgjer: Omvikdalen Bondelag stilte mann- og kvinnesterke då det skulle protesterast mot årets landbrukstilbod frå staten.
Overtok livbåtfabrikken: Arvid Skogseide var blant eigarane då Herde Kompositt overtok drifta av fabrikken til Palfinger i Ølve. Listetoppane til Senterpartiet var mellom dei som var innom og høyrde Skogseide og Kristin Biseth fortelja om planane deira.
Statsministerbesøk: På same dag var både Erna Solberg og Trygve Slagsvold Vedum på vitjing i Kvinnherad. Erna fekk mellom anna prøvstitja aluminiumsstolen til Hydro Husnes.
På senteret: Trygve Slagsvold Vedum storkoste seg på Husnes storsenter i slutten av august, saman med mange lokale Sp-politikarar i valkampmodus.
Folkehelseprisen: I august overleverte Elsa Helland og Sara Mead den særs fortente folkehelseprisen for Vestland til Astrid og Pål Haugland.
Opprykkskamp: Synne Eide Bjørnebøle hadde ein stor sesong i Åsane-trøya, og spelte opprykkskamp til Toppserien mot Lyn i november. Ho var også med i kampen om tittelen som årets spelar i 1. divisjon.
Treningsrom for eldre: Rosendalstunet gjekk i sommar til innkjøp av vitalkonseptet til Feelgood, som består av fem motoriske treningsmaskinar. Det er tidlegare einingsleiar ved Rosendalstunet Leif Kongestøl og fysioterapeutane Knut Richard Alvheim og Anne Teigen Myklebust som står bak prosjektet. Til høgre Tone Tufta Gaugstad som er ny einingsleiar for Rosendalstunet.
Ny ordførar: Etter at Hans Inge Myrvold vart fast møtande vararepresentant på Stortinget måtte Kvinnherad kommunestyre velja ny ordførar. Ein spennande politisk dragkamp såg Hilde Enstad (Ap) overta ordførarkjede, med Leif Sverre Enes (H) som ny varaordførar.
I skårfeste: Sju år gamle Brynjar Heggland Kvernmo blei i juni sitjande fast i ein stor steinhaug i Omvikdalen. Jubelen og applausen runga då redningsmannskapa fekk guten fri att.
Pride Kvinnherad: Laurdag 3. juli vart Pride Kvinnherad markert med appell og regnbogetog. Mellom 60 og 70 personar hadde tatt turen for å delta på hendinga.
Stortingsval: Mange nytta sjansen til å levera si røyst til stortingsvalet då to medarbeidarar frå Kvinnherad kommune tok med seg valurna til Åkra skule. Lars Alsaker var truleg eldstemann som møtte fram til røystinga.
Heidra Emma: Emma Weberg Kaldestad mista livet etter ei trafikkulukke på Baugstranda i juli. Då kista hennar kom til Årsnes venta 60-70 køyretøy og endå fleire folk for å følgja ho på ferda til Husnes.– No skal vi følgja Emma heim, sa storesøster Lilly.
Medaljesamlar: Anders Kjærevik fekk eit skikkeleg gjennombrot i 2021, og sikra seg blant anna sølvmedalje i både «Skyrunning European Championship» og Ultra-NM.
Drapet på Varaldsøy: 22. april gjekk drapsalarmen i Kvinnherad etter at Renate Strand Normann vart funnen død i terrenget på Varaldsøy. Den sikta for drapet vart arrestert same dag, og sit framleis varetektsfengla i påvente av rettssak.
Slo ring om skulen: Ein ny runde med skulestrukturdebatt fekk 225 store og små omvikdelingar til å slå ring om skulen sin før kommunestyret skulle ta stilling i saka.
Storøving på Sunde: Velferdslaget for Kvinnherad ambulanse fekk i vår tildelt 340.000 kroner av Sparebank 1 Stiftinga Kvinnherad. Pengane gjekk til å fullfinansiere eit varmesøkande kamera til ambulansebåten. Samstundes som utstyret vart testa ut og demonstrert, gjennomførte dei lokale naudetatane ei øving med eit redningshelikopter frå Luftforsvaret.
Ny brannstasjon: I november kunne Kvinnherad brann og redning ta i bruk den nye hovudbrannstasjonen på Husnes.
Bind og tampongar: – Blodig rettferdig, sa elevane Andrea Melheim, Weronika Kondracka, Mathilde Ersland, Adele Askeland, Ingrid Jonette Ljones, Sophie Mehri, Wiktoria Kondracka og Elianne Joy Hjelmeland ved Kvinnherad vidaregåande om vedtaket om å dela ut gratis bind og tampongar til elevar i vidaregåande
Årets namn: lenn A. Opland har to svært travle år bak seg som kommuneoverlege. Grenda sine lesarar kåra han til årets namn i Kvinnherad i 2021.
Først vaksinert. Odd Saltnes (86) var den fyrste i Kvinnherad som fekk koronavaksinen. Sjukepleiar Hege Kristin Raudstein sette vaksinen på Odd 11. januar.
Norge på langs med paraglider: Anders Kråkevik var i juli klar for å leggje ut på eit eventyr av dei sjeldne. Med paraglider og propell på ryggen skulle han fyke frå Nordkapp til Lindesnes.
Brann i husrekkje: Eit fritidshus brann ned til grunnen, og to naust måtte gje tapt for flammane då ein gassomn byrja å brenna på Eikelandet Brygge i Uskedalen i april.
Newtonrommet: Casper Aarsand Stensletten var blant dei mange som fann seg ein god boltreplass då Newtonrommet opna i oktober.
Torvald i 100: Han var daud av tyfus og skulle skytast ved daggry, men i juni var Torvald Karlsen 100 år. Dagen vart feira med sjakkspel og telegram frå Kong Harald VII.
Europameister: I møtet med tidlegare verds- og europameistrar heldt Terje Bakke stålkontroll på både piler, boge og nervar – og vann EM med reservebogen sin.
Lesartur: Veteranbåten D/S «Stord I» tok Grenda-abonnentar og andre med på to lesarturar i samband med 70 årsjubileet til avisa. Dampskipet baud på tur Sunde gjennom Fjelbergsundet og tilbake, og frå Rosendal til Sunndal og attende.
«800 001»: Den nye filmen til Brit Landa vart i september endeleg vist for eit publikum. – Det siste året har koronapandemien teke mykje av merksemda rundt om i verda. Det fører til at andre viktige tema kjem litt i skuggen. Ei side som verkeleg vert gøymt er mental helse, og her har vi ikkje tid til å venta til koronapandemien er over, seier Brit Landa om filmen.
Krangla seg til opprykk: I sluttminutta gjekk det heitt for seg på sidelinja i oppgjeret mellom Halsnøy og Galgen, men trass provokasjonar og tap, vart det berre ein fartdump på veg mot opprykk til 5. divisjon for blåtrøyene.
Sommarutstilling: Espen Attramadal opna sommarutstilling i Rosendal. Utstillinga baud på spenstig keramikk, måleri og teikning.
Medaljegrossistane: Fredrik Nistad, Siri Aasgard, Mari Svendsen Fagerlid, Lilli Aksnes-Øystese og Emma Sandvik Rørdal kom alle heim frå NM i sandvolleyball med medaljar.
Opplevingstur til Smiedal: Sommarskulen baud på opplevingstur til Smiedal i Åkra. To ungdomsgrupper fekk såleis fine og innhaldsrike dagar.
Tap på julestjernene: Julestjerneproduksjonen gjekk med tap i 2021, på grunn av høge straumprisar. Terje Hus og Fredheim Gartneri produserte 30.000 julestjerner , med over tre kroner i tap pr. blom.
nyhende biletseriar nyhende
Powered by Labrador CMS