Arbeidstilsynet: Fleire brot på arbeidsmiljølova

Sidan 3. august har Arbeidstilsynet gjennomført tilsyn ved Rosendal Fjordhotel for å kontrollera korleis verksemda jobbar førebyggande med helse, miljø og tryggleik (HMS).

13. september kom rapporten, kor ein mellom anna kan lesa følgjande:

Arbeidstilsynet har motteke dokumentasjon som visar at dagleg leiar har opplæring i HMS. Det er planlagt opplæring for verneombod, men denne var ikkje gjennomført på tilsynstidspunktet. De kan visa til at det er inngått avtale med godkjent bedriftshelseteneste. Samarbeidsmøte med bedriftshelsetenesta var ikkje gjennomført på tilsynstidspunktet, men Arbeidstilsynet har 22.08.2022 fått ettersendt ein samarbeidsplan som viser kva for bistand de skal få frå bedriftshelsetenesta i komande periode.

Ni pålegg

På bakgrunn av funn som vart gjort i tilsynet har Arbeidstilsynet har verksemda no fått ni pålegg som må utbetrast før året er omme.

Før pålegga blir endeleg vedtekne av Arbeidstilsynet har hotellet moglegheit til å kome med kommentarar til punkta, så tidsfristane som er opplyst kan enno endrast.

Pålegga handlar om innhald i arbeidsavtale, manglande arbeidsplan, samt godtgjersle for og etterbetaling av godtgjersle for overtid. Hotellet må også iverksetje tiltak for å sikra kontroll med arbeidstida.

Fristen for å utbetra desse punkta er sett til 31. oktober 2022.

Dei fire siste pålegga har hotellet førebels fått frist til 12. desember 2022 på seg til å ordna opp i:

Hotellet må gjennomføra 40 timars opplæring på verneombod, utføra ei tilfredsstillande kartlegging og risikovurdering ved arbeidsplassen, få på plass tiltak og plan innan HMS-arbeid, samt gjennomføre tiltak innan bedriftshelseteneste.

Fleire brot på arbeidsmiljølova

Arbeidstilsynet forklarar korleis dei har vurdert dei ulike punkta som har fått pålegg ut frå arbeidsmiljølova, og viser samstundes til dokumentasjon dei har fått tilsendt av Rosendal Fjordhotel.

I denne gjennomgangen kjem det fram at det gjort fleire brot på arbeidsmiljølova.

Mellom anna blir det vist til at fleire av dei tilsette har jobba meir overtid enn det som er registrert utan å få betalt for timane dei har hatt krav på.

«Arbeidstilsynet vurderer på bakgrunn av tilsendt dokumentasjon at de ikkje har utbetalt overtidstillegg i tråd med lovkrava. (...) Dette er brot på arbeidsmiljølova paragraf 10-6 ellevte ledd», heiter det i rapporten.

Vidare er det fleire arbeidsavtalar som er levert inn som ikkje var gyldige i det tidsrommet som Arbeidstilsynet har undersøkt, og hotellet må også gjennomføra ei betre risikovurdering enn det dokumentet dei fekk tilsendt kunne visa til.

Mellom anna legg Arbeidstilsynet vekt på at risiko for arbeidsrelaterte muskel- og skjelett-plagar, arbeidspress samt uønskt seksuell merksemd må bli teke med i risikovurderinga.

«Det kom i samband med tilsynet fram at det har vore konfliktar ved hotellet. Arbeidstilsynet vurderer at risikofaktorar som kan føre til konfliktar må med i kartlegginga», heiter det vidare i rapporten.

Mellombels leiar må følgje opp

Christian Lyngholm har etter rapporten frå Arbeidstilsynet var klar gått av som hotelldirektør, og blitt erstatta med ein mellombels leiar, Håkon Gaarder-Larsen. Dette skjedde i samråd med styret.

Det er såleis Gaarder-Larsen som vil ha ansvaret for å følgja opp pålegga frå Arbeidstilsynet.