Arbeidstilsynet er varsla om uhaldbare tilstandar
Leiar for hotell- og restauranttilsette i Fellesforbundet i Hordaland, Devjat Hisenaj, har fått rapportar om uhaldbare tilstandar ved Rosendal Fjordhotel etter at ny dagleg leiar og nye eigarar overtok drifta.
Publisert
Sist oppdatert
På bakgrunn av dette har Hisenaj bede Arbeidstilsynet dra på tilsyn så snart det let seg gjera. Dette melder Bergens Tidende måndag ettermiddag.
Sidan byrjinga av juni har Grenda følgt situasjonen ved Rosendal Fjordhotel, der fleire av dei fast tilsette har sagt opp jobbane sine. Dette gjeld for fleire leiande stillingar ved fleire avdelingar på hotellet.
Annonse
Brot på arbeidsmiljølova
Det er ifølgje Hisenaj gjort fleire brot på arbeidsmiljølova ved Rosendal Fjordhotel, noko Grenda ved fleire høve har freista å få eigarane i West Coast Invest, samt den nye hotelldirektøren i tale om, utan å lukkast.
Den nye hotelldirektøren vart tilsett ved Rosendal Fjordhotel 1. mars i vår. Då kom han frå ein tilsvarande stilling ved Risør Hotel.
Eigaren av Risør Hotel vart ikkje nytta som referanse i tilsetjingsprosessen, noko eigaren sjølv, Dag Eikeland, kan bekrefta.
Annonse
– Eg kan bekrefte at eg ikkje har blitt kontakta som referanse i tilsettingsprosessen, seier Eikeland per telefon.
I underkant av 6 månadar
Personleg meiner han det er litt underleg å ikkje kontakta tidlegare arbeidsplassar når det gjeld leiande stillingar, men understrekar at det finst fleire preferansar som kan ligga til grunn i tilsettingsprosessar.
– Kor lenge var vedkomande tilsett hos dykk?
– Han blei hos oss i underkant av seks månadar, svarar Eikeland, som no er attende i stillinga som direktør for det familieeigde og -drivne hotellet.
Han og kona, Mona Gjester Eikeland, tilsette ein ekstern direktør då dei ynskja avlasting etter fleire år med mange ballar i lufta.
Annonse
– Etter tolv år som hotelldirektør i tillegg til alt anna eg held på med, var det naudsynt å få inn nye krefter, sa Dag Eikeland til Austagder Blad då vedkomande vart tilsett der i mai 2021.
– Så no har de gått tilbake til å gjera denne jobben sjølv?
– Ja, no driftar me det sjølv igjen, i tillegg til Stangholmen Fyr. Så om det er nokre blide vestlendingar som ønsker seg til det blide Sørlandet, er dei hjarteleg velkomen, sluttar Eikeland.
