Arbeidsløysa ned 10% i Kvinnherad

Det er fleire som slit med å finna arbeidskraft i Kvinnherad, samstundes arbeidsløysa i kommunen er relativt låg samanlikna med resten av landet. Dette fører til ein «stram» arbeidsmarknad.

Ved utgangen av september var 5 585 personar registrerte som heilt arbeidsledige i Vestland. Dette er ei auke med 580 personar sidan september 2022, men talet arbeidsledige held seg framleis svært lågt i Vestland. Dette kjem fram i ein pressemelding frå NAV Vestland.

Landsgjennomsnittet er 1,8 prosent, medan Vestland ligg på 1,6 prosent. Sunnhordland ligg på 0,9 prosent, og Kvinnherad ligg på beine 1 prosent heilt arbeidsledige.

Lågast i Vestland er kommunane Sveio og Stord med høvesvis 0,7 og 0,8 prosent. Dei høgste er Hyllestad (3,8%), Årdal (3,4%) og Fedje (2,2%). Høgste endringa sidan i fjor er på Tysnes, der arbeidsløysa har gått opp med 143%.

I Kvinnherad hadde vi 70 heilt ledige på denne tida i fjor, no ligg talet på 63, og talet har altså gått ned med 10%.

Ledige stillingar

På Finn.no ligg det no ute 2238 ledige stillingar i Vestland fylke og 29 av desse er i Kvinnherad. Flest ledige stillingar finn ein i kategoriane Helsepersonell (359), Handverkar (272) og Ingeniør (329).

– Det venta taktskiftet i arbeidsmarknaden ser ikkje ut til å skje på Vestland denne månaden heller, seier fungerande direktør Bjarte Hysing-Olsen i NAV Vestland i pressemeldinga.

Talet på ledige stillingar i Sunnhordland har gått opp med 50 stillingar sidan førre månad.

– Stillingstilgangen har gått opp. Den er mest opp innan Helse- og omsorgsnæringa, men også innan Bygg- og anlegg ser vi ein særleg oppgang, seier leiar i NAV region Sunnhordland Håvard Lægreid i ei anna pressemelding.

Her kjem det fram at Sunnhordland hadde ein nedgang på 44 heilt ledige frå august til september.

– Vi følgjer tett med på utviklinga. Den seier noko om aktivitetsnivået i arbeidsmarknaden. Vi ser no at talet går ned, og er på same nivå som før sommaren, seier Lægreid.

Den gjeldande arbeidsmarknaden er det NAV kallar for «stram». Dette vil seie at det er underskot på arbeidssøkjarar og arbeidsgjevarar slit med å fylla stillingane.

– No trur vi at å knyta verksemder som har eit behov for å tilsetja folk med nye grupper menneske. Her er flyktningar ein av desse, seier Lægreid.