Arbeidsløysa i Vestland auka i juli

Dette kjem fram i ei pressemelding frå Nav Vestland. Arbeidsløysa i Vestland ligg likevel, med sine 2,9 %, under landsgjennomsnittet på 3,1 %.

For Kvinnherad sin del var det ved utgangen av juli 117 personar som gjekk heilt arbeidsledige. Dersom ein samanliknar med same tid i fjor er dette ei vesentleg betring. Då var nemleg 201 personar registrert som heilt ledige.

Kvinnherad kommune ligg no på ei prosentvis ledigheit på 1,8 % blant personar som er heilt ledige. Den same prosenten kan også Sveio skilta med, medan det i dei andre kommunane i Sunnhordland er ein større prosentdel av innbyggjarane som står heilt utan arbeid.

Mindre aktivitet om sommaren

At det er fleire som går heilt arbeidsledige i juli kjem ikkje overraskande på NAV.

– Lågare aktivitet i ferietida er grunnen til det, slår avdelingsdirektør i NAV Vestland, Knut Steinar Eitungjerde, fast.

Det er vidare forventa at arbeidsløysa vil gå ned utover hausten, noko som mellom anna blir grunngjeve med at fleire vil vera vaksinerte og at gjenopninga av samfunnet krev fleire folk i arbeid.

Blant Vestland sin ungdom under 25 år er trenden motsett, ser ein på skilnaden mellom juni og juli i år. Ved utgangen av juli var det registrert 1112 heilt ledige i denne gruppa, noko som er 7% færre enn i juni.

I juli har det i følgje NAV vore 5549 ledige stillingar tilgjengeleg i regionen.