Arbeidet i gang med Troåslia Terrasse

Gravemaskinen er i gang i botn av tomta og kontraktane med underleverandørane er signerte. Even Teigen gler seg over at prosjektet no svingar seg i gang.

– Alle kontraktane er signerte, og alt er på plass, smiler ein nøgd Even Teigen.

Han samla tysdag dei fleste bedriftene han har signert kontakt med til ei markering av at Troåslia Terrasse no skal ta form.

Kor er kaka?

Ti leilegheiter i terrassar på fem etasjar, med store terrassar på kvar høgd. Anleggsvegen inn i botn, medan innkøyrsla kjem frå toppen i Kleivavegen. Teigen ikkje vil avsløra kontraktssummane, men det er ope og klart at leilegheitene har ein samla salssum på 52,5 millionar. Utsikta er storslagen ut over Husnesfjorden, og på betre dagar enn tysdagen ser ein fint andre ting på Tysnes enn berre lågt skydekke. Leilegheitene er på rundt 100 kvadratmeter, medan terrassane er på knapt halvparten.

Sjølv om Teigen hadde samla to kvinner og åtte menn til å den symbolske markeringa av byggjestarten, så føregjekk det utan kake denne dagen, om enn til ei viss godmodig misnøye for underleverandørane.

– Nei, det har me ikkje fått! påpeikar Brede Grønnningen.

– Det tar me når det er ferdig. Og noko undervegs må det også bli, meiner Even Teigen.

Teigen Byggutvikling er byggherre, medan Teigen Bygg & Trelast AS er tømrar og totalleverandør på heile prosjektet. Byggservice tar seg av grunn- og betongarbeid, Husnes Røyr gar VVS, medan det er høveleg sjølvforklarande kva Kvinnherad Elektro skal gjera.

Viktig for dei lokale

Stian Ersland frå Novaform er byggherrerepresentant på prosjektet. Det er også ansvarleg søkjar på prosjektet.

– Det er han som skal trekka i trådane og styra underleverandørane. Sjå til at det går som det skal, smiler Even Teigen.

Iverk, med Signe Torill Skogseth og Mats Mo som lokale representantar, har hatt prosjektering både som arkitektar og rådgjevande ingeniørar innan bygg

Betongelement blir levert frå Hå Elementer og heisen skal Otis stå for. Felles for dei to siste er at dei ikkje er lokale, som dei einaste.

– Dette er veldig viktig for bedrifter som oss, og veldig kjekt at dei har valt lokale entreprenørar til jobben, i staden for å gå til ein storby for å få ein pakkepris hos ein stor leverandør, seier Brede Grønningen i Husnes Røyr.

– Det er eit bevisst val frå vår side. Me har nok gode lokale underleverandørar å velja frå, rosar Even Teigen tilbake.

– Dialogen blir enklare, og me har betre kontroll på alle ledda i prosessen, vurderer Teigen vidare, som legg til at dette er eit prosjekt dei har jobba med i fire-fem år.

– Tomteeigaren me kjøpte av hadde allereie fått tomta regulert til terrasseleilegheiter, fortel han.

– Eg teikna faktisk eit slikt kompleks for dei også, smiler arkitekt Signe Torill Skogseth frå Iverk.

Komplekset skal etter planen vera ferdig i løpet av neste år.