Ap spør om Privat Omsorg

Arbeidarpartiet har lese om bedrifta Privat Omsorg, som no er starta opp av Halsnøy-kvinna Janne Hvidevold. Dei ynskjer ein debatt om saka i morgondagens kommunestyremøte.

– Det blir spennande og interessant å følgje med korleis tilbodet deira vert motteke i Kvinnherad. Det melder seg sjølvsagt òg ein del spørsmål, i og med at dei framleis skal vera tilsette i Kvinnherad kommune, skriv Hilde Enstad til ordføren.

– Ap bed derfor om at kommunestyret får ei orientering om korleis kommunen som arbeidsgjevar vil forhalde seg til dei tilsette og firmaet, og om det er aktuelt for kommunen på sikt å kjøpe tenester frå Privat Omsorg. Bed om at det vert høve for kommunestyrerepresentantane til å stille spørsmål til orienteringa, legg Enstad til.