– Ansvaret ligg hos staten

Tysdag 16. august fekk kommuneadministrasjonen nokre spørsmål frå Grenda angåande kraft og økonomi.

Mellom anna om det er aktuelt for kraftkommunen Kvinnherad å gje innbyggjarane ein endå rimelegare straumpris, til liks med ordninga som til dømes er innført i Tokke kommune. Der betalar næringsliv, private og hytteeigarar om lag 50 øre per kilowattime for straumen, inkludert moms og avgifter.

– Kvinnherad er med i Landssamanslutninga av Vasskraftkommunar. Vi som er med der har hatt jamlege møter sidan januar, kor vi har diskutert straumprisane, korleis ein skal forholda seg, og ulike løysingar, seier ordføraren, og held fram:

– Landssamanslutninga har frårådd oss å tilby billigare straum til innbyggjarane våre, og vi meiner at ansvaret må plasserast der det høyrer heime. Her må olje- og energiministeren og næringsministeren på bana.

Ikkje aktuelt med kommunal straumstøtte

I Vestland fylke er har det blitt vedteke å gje billigare straum til private og, eller bedrifter i kommunane Lærdal Aurland, Luster og Modalen. Ei slik løysing er ikkje aktuell for Kvinnherad, og Enstad utdjupar kvifor:

– Dersom vasskraftkommunane byrjar å dele ut straumstøtte til innbyggjarar og næringsliv, så vil regjeringa sjå på inntektene våre på nytt. Vi meiner ei kommunal straumstøtte vil kunne forringe inntektene og økonomien vår.

Situasjonen er eit statleg ansvar og ordningane må gjelda for alle, meiner ordføraren.

Dyrt med desentralisert kommune

At Kvinnherad er ein kraftkommune kjem likevel innbyggjarane til gode, mellom anna blir ein del av konsesjonskrafta, totalt 16 Gwh, nytta til kommunale bygg og kyrkjene i kommunen.

Ekstrainntektene som kjem frå sal av konsesjonskraft bidreg også som eit gode for innbyggjarane.

– Vi gjer opp for underskot, til dømes i barnehagane og skulane. Det kostar å ha ein så desentralisert struktur som vi har her i Kvinnherad, men med desse inntektene har vi råd til det, slår ordføraren fast.

Regjeringa sitt ansvar

Enstad melder vidare om at det rår ein uro blant Ap- og Sp-ordførarar frå heile landet.

– Ordførarane rundt om i landet er fortvilte og svært bekymra for dei lokale bedriftene no. Det er vanskeleg å ikkje ha noko svar å gje til innbyggjarane våre, men i denne saka meiner vi det er regjeringa som sit med løysinga, og dette ansvaret må dei etter kvart ta, seier ho bestemt.

Ho legg til at dei har prøvd å overtyda regjeringa om at næringslivet må få straumstøtte, og no ser det endeleg ut til at det skal koma ei løysing for denne målgruppa i september.

– Vi som er med i Landssamanslutninga for Vasskraftkommunar har peika på løysingar som viser at ein kan gje straumstøtte til næringslivet gjennom ordningar som liknar den som gjeld private husstandar, utan at det kjem i konflikt med EØS-reglementet. Men eg trur ikkje det er ein slik type ordning som blir lagt fram i september, men ein meir byråkratisk versjon, spår ho varsamt.

Vondt av nye verksemder

Det er tydeleg at ho har omsut for det lokale næringslivet, og kanskje særleg for nysatsingar, som enno ikkje har bygd seg opp ein buffer å ta av i nedgangstider.

– Dei høge straumprisane har ikkje vore moglege å føresjå, og det er mange verksemder som no er for små og for nye til at straumstøtteordningane treff. Desse har eg verkeleg vondt av, sluttar ho.