Anna Marie heilt i 100
Anna Marie Fludal feira 100-årsdagen sin med ope hus, snittar og kaker laurdag ettermiddag.
Grenda fekk vera med på festen som var stelt i stand hos son og nabo Oddvar, på småbruket ved Opsangervatnet. I den forma Anna Marie er i, var det sjølvsagt at ho skulle feira dagen. Ho er sosial, og likar å koma saman med slekt og vener.
– Selskap er det kjekkaste ho veit. Jo fleire, dess betre, kjem det frå Oddvar.
Artikkelen held fram under annonsen.
– Er det travelt å ha fest?
– Nei, det er dei som arbeider. Eg sit berre her og tek det med ro. Eg må seia det er veldig kjekt. Det kjem mange kjekke folk, og det er veldig koseleg, seier dagens hovudperson.
100-åringen bur åleine og greier det meste sjølv. Ho bakar brød og lagar middag. Då får ho det slik ho vil ha det.
– Alle barneborna snakkar om «bestobrød» med brunost, fortel barnebarnet Andrea.
– Og mjølkekakene hennar, skyt barnebarnet Maria inn.
Anna Marie er glad og takksam for at ho får bu heime i huset sitt.
– Eg lagar mat, men tek ein kvil når eg er ferdig med middagen. Så vaskar eg opp etterpå, fortel ho.
Oddvar køyrer mora til butikken ein gong i veka. Ho har med seg hugselapp, og går rundt med handlevogna sjølv.
Artikkelen held fram under annonsen.
– Ho pitlar fram dei varene ho har mest tru på. Dersom dei har fin kjøtdeig til rett pris, kjøper ho ein eller to pakkar. Dagen etter lagar ho kjøttkaker og saus. Ho et noko, og frys ned resten. Men potetene må vera nykokte kvar dag. Det må vera mjølne Kerrs Pink frå potetbilen, smiler Oddvar.
Anna Marie seier ho aldri kunne ha budd heime om det ikkje var for han.
– Dei er kjekke dei andre borna mine, og, men eg veit ikkje kva eg skulle gjort utan Oddvar. Han hjelper meg med mykje, og gjer alt så skikkeleg og fint at det skin oppe hos meg, seier jubilanten.
Les dikt og lokalavis
Ho ser uforskamma ung ut, er klar i blikket og snakkar som ein ungdom.
– Men eg har ulike plager. Eg er litt svimmel, og det minkar på synet. Men eg les lokalavisa og diktbøker med lupe, fortel ho.
– Har du eit favorittdikt?
– Dei bør i alle fall gå på rim, slår ho fast.
Artikkelen held fram under annonsen.
– Besto kan mange dikt utanåt. Ofte handlar dei om kjærleik eller lukke, fortel Andrea.
– Ho er 19 år i hovudet, meiner sonen Oddvar.
– Ja, det er det som er så løye. Eg kan seia alt til besto. Vi snakkar om det meste, seier Andrea.
– Besto har veldig god humor. Og så forstår ho det meste. Då eg kom ut som lesbisk, gjekk ho nokre rundar med seg sjølv. Men til slutt sa ho at «du er jo fødd sånn, og kan ikkje noko for det». Det betydde mykje, seier Maria.
Anna Marie er opphavleg frå Nærfjorden, mellom Mosjøen og Sandnessjøen i Nordland. Helgelandsdialekta har ho framleis, trass i at ho berre budde der den første fjerdedelen av livet. Ho og mannen flytta til Sunde i 1949. Mannen hennar Lasse jobba på Gravdal Skipsbyggeri. Med fem ungar, ei gamal og sjuk bestemor, førti sauer, griser og høns hadde Anna Marie rikeleg å gjera på. Mannen døydde allereie i 1968.