Anita har yogakurs på bassengkanten

Den fyrste halvtimen etter frammøte gjekk med til badstue og å symja rundt i varmebassenget som ein form for roleg oppvarming. Etterpå var det klart til yoga på bassengkanten.

Det var ein god atmosfære med dempa belysning, roleg musikk og sildring ifrå bassenget. Til og med lukta av klor hadde ei avslappande effekt då timen starta med djupe inn- og utpust.

– Pust roleg inn og ut medan de held fokus mellom augnebryna. Held hendene saman og inntil brystet, og berre kjenn litt på kontakten mellom kroppen din og matta. Finn ditt eige tempo, seier Anita ifrå instruktørplassen.

Når pusten sit, skal vi gjere det samstundes som andre øvingar, som å svinge beina frå side til side mens ein ligg på ryggen. No blir det vanskelegare å puste ordentleg.

– Dette er ei øvingssak, men berre gjer så godt de kan, seier Anita.

Alltid vore ei interesse

Tidlegare på dagen har Grenda møtt Anita i heimen hennar i Uskedalen. Heilt øvst i huset har ho eit eige yogarom, der ho praktiserer yoga, har ein-til-ein-timar og planlegg øvingar og kurs.

– Eg har praktisert Yoga litt av og på dei siste ti åra, men berre for min eigen del. Det er ein god måte å røra kroppen på utan å belasta den for mykje, fortel Anita, som i fjor fekk god nytte av yoga då ho fekk ein tøff prolaps i ryggen.

Anita er utdanna sjukepleiar og jobbar for tida i bu- og habilitering i Kvinnherad kommune. Ho utdanna seg som Mediyoga-instruktør våren 2022 og går no på eit Aquafitness-kurs.

– Aquafitness er trening i vatn. Det er god trening, og eg ser for meg at det kunne vore ein god kombinasjon med det i varmebassenget og så yoga etterpå. Eg vil prøva det eit par kveldar på kurset no for å sjå om det fungerer, og om det er noko å ta med meg viss eg får halda likande kurs til hausten, seier ho.

Å halde kurs var ikkje noko Anita såg for seg sånn med det fyrste. Men då venninna hennar Maria snakka om at ho sakna eit slags yoga- og badstue-tilbod i kommunen og oppmoda henne om å starta yoga i varmebassenget, var ikkje Anita vond å be.

– Det var litt rart i starten, å sitta med mikrofon og skulle instruere andre i yoga som eg plar gjere heime på eigenhand. Men etter eit par gonger gjekk det veldig greitt, og det er kjekt at det var så god respons, seier ho.

Kurset vart fullteikna på to dagar, og ho har 20 stykke på ventelista.

Mediyoga

Mediyoga er ein holistisk teknikk som balanserer det fysiske, mentale og emosjonelle. Det er som yoga på resept med fem forskjellige ingrediensar; pust, fysiske øvingar, handstillingar, fokus og mantra, og blir i dag brukt som eit kompletterande behandlingsverktøy i helsevesenet rundt omkring i Noreg, ifølge mediyoga.com.

– Eg har annakvar time med Mediyoga og Yin Yoga. Yin Yoga er roleg yoga, der ein held stillingane lenger enn i andre typar yoga. Mediyogaen er òg roleg, og begge delar unna seg for dei som har helseproblem av ein sort eller som treng ei pause frå ein hektisk kvardag. Begge typane yoga egnar seg for å få kontakt med egen pust og kropp, kvar time set eg av ein stund til kontakten du har med deg sjølv, fortel Anita.

Ser for seg fleire kurs

Anita likar godt å instruera andre i yoga, og kan godt tenka seg å halda fleire kurs. Kurset ho held no er slutt i starten av mai, og etter det tek ho ein pause over sommaren.

– Eg vil gjerne halda kurs til hausten igjen, og gjerne i varmebassenget. Men det kjem jo an på fleire faktorar. Det hadde jo vore kjekt å kunna tilby kurs til litt fleire, og då må ein evt. finna eit større lokale. Eg veit at fleire på Valen kunne tenkt seg eit kurs òg, så om nokon har tips om lokale så er det berre til å seie ifrå, seier Anita, og legg til;

Det er mogleg eg lagar nokre arrangement i sommar, då kjem informasjonen på Facebook-gruppa mi Yinyoga Kvinnherad. Då vil det vere yoga kombinert med anna gøy, som bading i sjøen, grilling eller liknande.