Ane Guro gir seg på topp: – Har ikkje vore ei enkel avgjersle

– Eg har tenkt lenge på dette her, og gått mange rundar fram og tilbake. Så det har verkeleg ikkje vore ei enkel avgjersle, seier Ane Guro til Grenda.

Motivasjon

Avgjersla kjem etter at ho har gjennomført ein av sine absolutt beste sesongar i sanden, med eit knipent semifinaletap i OL-kvalifiseringa og nok eit suveren NM-gull som to av fleire høgdepunkt.

– Grunnen til at eg gir meg er at eg ikkje har den motivasjonen som trengs for å gå inn i ein ny vinter med like mykje trening og reising som eg har hatt før. Eg har kanskje kjent litt på at dei jentene som kjem bak har meir lyst og meir motivasjon enn det eg har. Og når eg ikkje er 100 prosent motivert, så føler eg heller ikkje at det er rett av meg å gå på ein ny sesong, seier den hardtslåande volleyballjenta.

Spor i sanden

Med det landa Tveit Hjortland på at det vanskelege valet var det beste, og sa at nok var nok etter ein imponerande karriere. Etter eit liv som sandvolleyballspelar har jenta frå Hatlestrand verkeleg sett djupe spor etter seg i sanden.

Blant mange toppar stikker nok bronsemedaljen frå World Tour-turneringa i 2018, gull i EM og fleire sterke resultat frå verdsserien seg mest fram. Og med sitt fjerde strake NM-gull i 2021, er Ane Guro blant dei idrettsutøvarane som trygt kan seia at ho gir seg på topp.

– Eg har opplevd og oppnådd utruleg mykje, som eg er stolt over at eg har fått vera med på. Eg avsluttar også etter ein god sesong, med sterke prestasjonar i OL-kvalifiseringa og eit nytt NM-gull. OL-kvalifiseringa var ei skikkeleg god turnering for vår del, og eg har aldri vore med å spelt så god volleyball som vi gjorde då. Så eg vil absolutt seia at eg avsluttar på topp, seier ho.

Meir tid heime

No går ho ein vinter i vente der ho ikkje skal ut på reise kvar 14. dag. Og sjølv om varme strender vert byta ut med slapsete fortau i hovudstaden, får ho også meir tid til å gjera ting ho ikkje kunne før.

– No skal eg ha heile vinteren i Norge, som kjem til å bli ganske så rart. Eg kjenner at eg slit litt med å finna roen, samtidig så gler eg meg veldig. Eg får no tid til å prioritera familien, og ser fram til å kunna reisa heim til Kvinnherad oftare. Tidlegare har eg berre vore heime til jul og ein gong om sommaren, men no får eg sjansen til å reisa heim langt oftare, seier Hjortland.

I tillegg til det skal ho endeleg få arbeida med det ho har utdanna seg som, nemleg barnehagelærar.

– Eg sit att med ein god følelse, samtidig som at det er veldig rart. Eg ser fram til å kunna jobba med den utdanninga eg har, sluttar Ane Guro.