Anders var først i køen då det nye testteltet opna

Anders Ertsland var den første som testa seg for korona i Kvinnherad kommune sitt nye testtelt måndag.

Folkehelseinstituttet har vedteke at ein no kan testa seg for covid-19 om ein mistenkjer at ein kan vera smitta. I tillegg er alle landets kommunar pålagt å kunna testa fem prosent av innbyggjarane sine i veka. Difor har Kvinnherad kommune no fått på plass eit testtelt i busslomma nedanfor Husnestunet.

Føre var

Klokka 11 måndag føremiddag stod Kristin Lamberg og Anna Kathrine Bjelland Mathisen frå Kvinnherad kommune klar til å ta i mot dei første pasientane. Først av alle var Anders Ertsland.

– Eg hadde litt feber i helga, så for å vera på den sikre sida og for å eventuelt unngå å smitta alle kollegaene mine, så bestemte eg meg for å testa meg i dag, seier Anders.

Han køyrde inn i teltet, rulla ned vindauga og fekk ein tynn vattpinne stukken opp i nasa. Alt unnagjort på under to minutt.

– Dette gjekk veldig fint. Det var langt i frå så ubehageleg som eg hadde trudd på førehand, seier Ertsland.

Bak han stod bilane i kø.

– Koronatelefonen har ringt kontinuerleg heile morgonen, så det er tydeleg at det er ein god del som ynskjer å testa seg. Med dette teltet på plass så skjer det på ein tryggare og meir effektiv måte, seier kommuneoverlege Glenn André Opland.

Rett i karantene

For å kunna møta opp til gratis koronaprøve i det nye, store teltet på Husnes, må du på førehand ha ringt inn og tinga time. Det gjer ein ved å ringa til kommunen sitt koronanummer (les: 90860166) mellom klokka 08.00 og 10.00.

– Det er viktig at ein ikkje berre møter opp. Det krevst eit forarbeid som skal gjerast, så ein må ringa først og så møta opp til det tidspunktet ein får, seier Opland og legg til:

– Sjølv om smitten er låg i Kvinnherad, er dette med på å avlasta helsetenestene og minska smitterisikoen. Skulle det koma eit smitteutbrot så er fort ein god del som skal testast i samband med det, og då er vi klare til å ta i mot dei som treng det, seier Opland.

Alle som har testa seg skal i karantene i påvente av prøvesvar.

– Det tek om lag fire dagar å få svaret. Så er det også viktig å minna på at sjølv om prøvesvaret er negativt, så skal ein vera i karantene ein dag etter at symptoma er vekke, seier kommuneoverlegen.

Han minner også kvinnheringane på å halda avstand og ha god hand- og hostehygiene.