Anders Totland og Rune Eikemo inviterer til fredfull konsert
Lenge har Anders Totland hatt planar om å laga til ein førjulskonsert. No inviterer han folk til biblioteket for ein koseleg kveld torsdag 12. desember.
– Av ein eller annan grunn har eg alltid tenkt at ein skikkeleg fin førjulskonsert er noko av det mest koselege som finst. Kanskje er det kontrasten til den stressande førjulstida? Noko med å laga litt lys i mørketida?, funderer Anders Totland i ei pressemelding til lokalavisene.
– Eller kanskje eg berre er veldig glad i julemusikk, sjølv om eg prøver å lata som om eg synes det er litt tidleg når kona skrur på julekanalen på bilradioen tidleg i november, konstaterer han.
Annonse
Vil senka skuldrene
Totland har fått med seg Rune Eikemo på vokal, og skal sjølv spela trøorgel. Kvinnherad bibliotek arrangerer konserten, og biblioteksjef Trude Hege Bergesen gler seg.
– Det er veldig kjekt å bruka lokale krefter. Både Anders og Rune er utruleg dyktige, og me på biblioteket lovar å gjera det me kan for å skape ei lun og koseleg stemning. Me håpar mange tek turen og får oppleva ein litt annleis bibliotekkveld med høg kosefaktor, oppfordrar ho.
Totland skriv i pressemeldinga at han har hatt ein travel haustsesong med boklansering og skuleturné, og gler seg til å senka skuldrene litt.
Annonse
– Det er heilt perfekt å starta juleferien heime med konsert i biblioteket, avsluttar han.
