Anders fekk draumejobben – vil ha med Kvinnheradskulane i MOT

Anders Næs sitt første møte med MOT var då han gjekk på Rosendal Ungdomsskule. Skulen var då med i MOT-programmet, og fekk folk frå organisasjonen på besøk. Anders vart hekta på konseptet med ein gong.

Utvikla robuste ungdommar

– Eg vart heilt trollbunde av MOT på ungdomsskulen. Der fekk eg lov til å vera meg sjølv. Det var mitt første møte med rollemodell-effekten, at det eg gjer og seier, påverkar andre, fortel ein oppglødd Anders Næs.

Då rosendelingen spelte på U-landslaget i fotball, vart han spurt om å vera lokal MOT-ambassadør, og spreia positive verdiar blant ungdommar på heimstaden. Det var i samband med dette at han hamna i Grenda og snakka så varmt om organisasjonen.

– Det å bli MOT-ambassadør er stort for meg. Kanskje eg kan vera med og hjelpa ungdom med gode val, sa Næs som sekstenåring.

MOT er ein ideell non-profit organisasjon som vart stifta i 1997. Målet til organisasjonen er å hjelpa ungdom med bevisstgjering av verdiar i sitt eige liv, og kva påverknad ein har på kvarandre. Det er kvar enkelt skule som avgjer om dei vil ta del i programma til MOT, og få besøk av ein MOT-representant med jamne mellomrom.

– Me er sikre på at programmet vårt hjelper for eit positivt skulemiljø, og med å byggja robuste og motstandsdyktige ungdommar, seier Anders.

Ingen peikefinger

MOT har sydd saman ulike program for ungdomsskular og vidaregåande skular. Programma inneheld eit tal økter i året, der elevane får besøk frå MOT. I desse øktene går ein gjennom ulike tema som er aktuelt for ungdom og livet elles. Organisasjonen vil førebygga mobbing, utanforskap og psykiske vanskar, og styrka robustheit, livsmeistring og mot.

– Me sit ikkje med nokon fasit eller halleluja-stemning. Men me inkluderer alle og skapar ein trygg plass for å tenka og prata om relevante tema. Hos oss får dei ein positiv energi, utan nokon peikefinger. Alle skal kunne vera seg sjølve, forklarar den ferske regionleiaren.

Anders bur i Bergen, saman med sambuar og to ungar. Men han er ofte i heimkommunen, sidan han framleis speler fotball for Rosendal. Han er utdanna spesialpedagog og lærar, og har jobba lenge i skulen.

Begeistringa for MOT forsvann aldri, og Anders har jobba målretta for å kunna bli med i organisasjonen på heiltid. Han skjønte at han mangla noko kommersiell erfaring for å oppnå draumen. Ein MOT-tilsett skal nemleg også jobba opp mot næringslivet, for å tilby leiarutvikling og for finansiering av MOT sitt ikkje-kommersielle arbeid.

– Så det siste halvanna året har eg jobba med leiarrekruttering innan finans, sånn at eg skulle bli betre rusta for ein jobb i MOT, fortel han.

Vil ha med Kvinnherad

Anders Næs blir no MOT sin representant for alle skular som organisasjonen har ein avtale med dei, og det blir mykje reising over heile fylket. Det er 52 skular i Vestland fylke som følgjer programma til MOT, og Anders vil gjerne ha med seg fleire.

– Me ser ei utfordring i kommune-Noreg no, der fleire unge som står i utanforskap, og ikkje er i jobb eller utdanning. Me veit at MOT kan bidra direkte inn med arbeid som førebyggjer dette, seier han.

Eit viktig mål for han er sjølvsagt også å få med seg fleire Kvinnherad-skular, sidan ingen av skulane her i kommunen er MOT-skular lenger.

– Eg vil veldig gjerne få Kvinnherad med på laget. Eg har sterk tilknyting til kommunen, og ynskjer at unge kvinnheringar skal få den same MOT-opplevinga som var så viktig for meg då eg gjekk på Rosendal Ungdomsskule, seier Anders.