Alvorleg hending på «Gurine» - mann vart liggjande i sjøen 10-15 minutt: – Eit skrekkscenario for oss

Onsdag datt ein mann ned mellom skutesida til «Gurine» og kaien. Derifrå greidde han ikkje å koma seg opp, og vart fyrst redda då nokon høyrde ropa om hjelp.

– Vi definerer dette som ei alvorleg hending, seier styreleiar Anders Jordal i Interesselaget for galeas Gurine.

Skuta ligg no ved Vik-kaien i Rosendal, eller Speranza-kaien som den eldre garde gjerne seier. For å redusera på vedlikehaldsbehovet, er båten for tida heilt kledd inn i presenning. Det er likevel behov for regelmessig tilsyn, noko som vert utført etter ei oppsett vaktliste. Det var i samband med slikt tilsyn uhellet skjedde onsdag ettermiddag.

Kakk i ryggen

– Det er éin ting som er negativt med presenningen, og det er at det har blitt vanskelegare å koma seg om bord. Det er nemleg ei dør i plasten som ein må plassera leideren inn i. I går skjedde det som kunne blitt fatalt. Vedkomande kom seg greitt om bord, men då han skulle på land att datt leideren ned mellom skuta og fenderen, samstundes som mannen fekk seg eit kakk i ryggen. Dermed falt han med leideren ned i sjøen, fortel Jordal.

Mellom skutesida og kaien er det naturleg nok svært trongt. I tillegg var det berre 5 grader i sjøen.

– Det var ei forferdeleg hending og eit skrekkscenario for oss. Mannen kom seg ikkje opp, og vart liggjande i om lag 10-15 minutt i sjøen og stressa. Då er det òg lett å få panikk. Han ropte om hjelp, og vart til slutt høyrd av ei dame som kom på kaien. Ho sprang då opp til arbeidarane som jobbar på Rosendal Bryggje, og fekk fire av dei med seg. Dei fire greidde å få mannen på land, informerer Anders Jordal.

Ingen skal om bord

Heldigvis var mannen ikkje skadd, og han kom seg etter kvart heim og fekk varmen i seg, så alt står etter tilhøva bra til.

– Men det var ein veldig farleg situasjon, og ei hending vi ikkje skal ha. Vi tek sjølvsagt vare på mannen så godt som vi kan, og i tillegg har vi innført nokre umiddelbare tiltak. Vi har stoppa all aktivitet på «Gurine», fram til vi har funne ei betre og sikrare løysing for å koma seg om bord og på land. Ingen skal no gå om bord i båten, med mindre det er heilt nødvendig, men då skal dei vera to i lag, opplyser Anders Jordal.

Sidan Interesselaget for galeas Gurine er ei foreining som har ansvar for eigne aktivitetar og for folka som er med, og såleis er ei slags bedrift, har han sjekka på nettsida til Arbeidstilsynet om hendinga må rapporterast inn til dei. Men så lenge ingen vart skadd, skal ein ikkje senda slik melding.

– Vi definerer det uansett som ei alvorleg hending, for det er alvorleg når folk dett på sjøen. Vi skulle helst vore uhellet forutan, men når det fyrst skjedde, er vi svært glade for at det gjekk bra, understrekar Anders Jordal.