Alle barn fortener ei aktiv fritid

Akkurat no bur kvart sjette barn i verda i eit område med krig eller konflikt. Årets TV-aksjon går til Redd Barna og deira arbeid for å hjelpa desse barna. Ein stor del av denne hjelpa er å sørga for at alle barn har trygge områder for leik og ein aktiv fritid.

Tidlegare år har aksjonsgruppa arrangert kulturfest i høve TV-aksjonen. Men i år gjorde dei det litt annleis, og meir i linja med årets innsamling.

– Sidan midlane går til Redd Barna sin innsats for krigsramma barn og at dei skal få ha ein aktiv fritid, arrangerer vi «Barnas dag» i Kvinnherad arena, fortalde Veronica T. Thorsen til Grenda førre veke.

Inntektene frå salet i kiosken gjekk til TV-aksjonen, og å dømma av den folksame køen fekk dei inn nokre kroner i løpet av dagen. Men hovudpoenget var aktive barn, og det var det nok av denne fredagen.

Mange aktivitetar

I entreen til Kvinnherad Arena var det fullt i jakker og sko, noko som vitna om det store talet menneskjer som var til stades for å leika, preika og støtta TV-aksjonen.

Tre av dei var Serina Hansen (10), Pia Normann Fjelberg (10) og Lotta Normann Fjelberg (8).

– Det er veldig kjekt å vera her, og så masse forskjellig å gjera på, fortalde dei til Grenda, før dei ein etter ein sprang og hoppa over ein bukk, støtta opp av dei frivillige Alva og Mina.

Vetle Linnea (1) hadde det også kjekt, men for travelt med å krabba av gårde til å ein gong ensa bladfyken.

Mellom boblefotball, klatring, rulleskøytedisko, badminton, turning og papirfly var det nok av aktivitetar å vela mellom for ungane. Mange tok turen innom klatreveggen.

– Eg brukar vera her kvar torsdag, det er veldig kjekt at vi har fått ein så bra klatrevegg her, fortalde Lukas Aleksander Sunde (17).

Han byrja med klatring når tilbodet starta opp i Kvinnherad Arena, og har ikkje tenkt å gje seg med det fyrste.

– Det er eit veldig godt miljø her, og så er det jo god trening. Eg kjenner det ikkje så godt når eg klatrar men etterpå kjenner eg det veldig godt i armane, lo han.

Ein anna som klatrar så ofte han kan er Milas (8). Mamma Mona Eide Saghaug skryt over tilbodet i Kvinnherad Arena, og er glad for at sonen har funne ein plass han passar inn. Og passar inn gjer han, der han fyk opp over veggen gong etter gong medan mamma og søster Emilie (10) står og ser på.

– Det er veldig interesse for klatring, og vi håpar at det kan vera ope litt meir enn dei dagane det er no, seier Mona.

– Eg har ikkje lyst å prøva meg, det er litt høgt, skyt Emilie inn.

Første oppdrag

Vegard Bjørnevik hadde sitt fyrste offisielle oppdrag som flunkande ny ordførar på open dag. Han var invitert til å delta, og både store og små stoppa bortom for ein prat og for hjelp med papirflyet sitt før Bjørnevik leia papirflykonkurransen.

– No skal eg visa dykk korleis det kan gjerast. Ikkje korleis det skal gjerast, sa han til ein spent gjeng som var klare for å kasta flya sine.

– Eg veit ikkje kva veg dykk bretta flya dykkar til å gå, men mitt går i alle fall til høgre, det er eg ganske så sikker på, smilte Bjørnevik, og lét flyet dala.

Det var ein plass mellom 20 og 30 stykke som kasta fly, og dei tre som kasta lengst fekk seg ein brus og eit kakestykke.