Alexander (16) er klar for hummarsesongen

På Halsnøy er det mange flinke, unge fiskarar. Det er nok fleire på denne øya som kan handtera ein båt før dei kan sykla. Slik var det i alle fall for Alexander. Allereie som liten gutunge var han med far sin på fiske. Sidan då har han fiska det som det er sesong for.

– Eg har vore interessert i båtlivet og fiske sidan eg var liten. Pappa er jo yrkesfiskar, og det er han som inspirerer meg. Om det ikkje er båt eg køyrer, er det vasscooter, smiler Alexander.

– Han har alltid vore med, og visar ei stor glede av arbeidet. Så er det jo viktig å læra ungane at maten me et ikkje kjem frå butikken, skyt far Raimond Sjo inn frå sidelinja.

Agn og teiner

Fredag, 1. oktober klokka 08.00 er det igjen lov å fiska etter hummar langs kysten. Alexander har fiska hummar i to år, og er klar for nok ein sesong. I Kobbebukta fiskerihamn på Halsnøy er det planlagt agn og teiner i lang tid.

– Me nyttar sur makrell, som har surna i fleire dagar. I tillegg har me salta den, informera halsnøybuen.

Ein må altså hugsa på å finna godt og rett agn for å lokka til seg hummaren. Alexander kjem også med nokre reglar når det gjeld hummarfiske.

– I 2018 vart det mellom anna vedteke at hummarteiner skal ha nedbrytbar bomullstråd, som rotnar vekk etter nokre månadar i sjøen. Me klargjere difor alle teiner med rotnetråd. Denne regelen kom også på leppefisk i år. I tillegg skal ei hummarteine ha minst to fluktopningar, éi på kvar side av teina. Fluktopningane må vera minst 60 millimeter slik at hummaren under minstemål enkelt kan ta seg ut. Hummaren som er mindre enn 25 centimeter må settast ut igjen i sjøen. Det same gjeld om hummaren har rogn, då er den freda heile året, fastslår han.

Ungguten har eigen båt, og fiskar mykje på eigenhand. Og om han fiskar med far sin, er det likevel Alexander som styrer skuta.

– Eg har ein hobbybåt, og den er grei den altså, men nett no er den på service. Pappa har ein endå større. Det er ein 20 fot elektrisk kraftblokk, så det er ein skikkelig teinebåt, fastslår han, og held fram:

– Me fiskar mellom anna hummar, og leppefisk om sommaren, så vert det litt torsk og forskjelleg på vinteren. Eg fiskar lite med stong, for det er garn og teine som er kjekkast. Eg har ikkje tolmod til anna.

Store draumar

Alexander har ein draum om å få fiskeri som levebrød. Men fyrst må han fullføra skulegangen. Han går no fyrste året på TIP ved Kvinnherad vidaregåande skule.

– Eg likar meg godt på TIP. Det er veldig varierte skuledagar, og eg lærar meg noko nytt kvar dag. Draumen er å bli matros, fortel han.

Hummarfiske må difor skje etter skuletida.

– Eg må nok prioritera skulen, så får eg ta trekkinga når eg kjem heim att. Eg kjem til å trekkja dagen etter teinene er satt, for eg klarer ikkje å vente lengre enn det. Og då unngår ein forhåpentlegvis tjuvtrekking òg, ler han.

I fjor fekk Alexander fire hummarar. I år har han eit mål om å dobla dette.

– Eg gler meg skikkelig til sesongen byrjar. Det er årets høgdepunkt, og eg håpar eg får fleire enn i fjor. Målet er åtta hummarar, smiler han.

Å fiska er både spennande og kjekt, men det kan nok bli nokre lange dagar med hardt fysisk arbeid.

– Det kjekkaste er å køyra båt, og sjå kva som er i fangsten. Det er spenninga som driv meg. Og med fisking er ingen dag lik. Det kan bli nokre lange dagar, spesielt på leppefiske. Ein dag i sommar sat eg og far min 400 teiner. Me byrja klokka sju om morgonen, og var heime seint på ettermiddagen. Men eg syns det er svært kjekt, fortel han.

Eiga næring

I sommar har Alexander og far hans levert leppefisk til Alsaker Fjordbruk.

– Me fiska totalt 48 000 leppefisk, og det er mange. Dei siste åra har eg også fått ei ungdomskvote på opp til 50 000 kroner.

Kva sparar du til?

– Eg sparar til både hus, båt og teiner. Ein dag ynskjer eg å ha mi eiga næring, og då treng eg mellom anna ein stor fiskebåt, sluttar han.

Det er kjekt å treffa ein ungdom med både mål og draumar for framtida. Hummarsesongen byrjar allereie i morgon, fredag, og det er nok mange fleire enn Alexander som er klare for hummarfiske.

Skitt fiske til både Alexander og resten av hummar-entusiastane!