Ål er Årets nynorskkommune 2021
I dag, måndag, vart prisen for Årets nynorskkommune 2021 delt ut på Litteraturhuset i Oslo. Kvinnherad kjempa mot Ål, Herøy og Stad om den gjæve tittelen.
Publisert
Sist oppdatert
Prisen vart, på vegne av Kulturdepartementet og regjeringa, delt ut av statssekretær Oddmund Hoel. I tillegg til heider og ære for god språkbruk, fekk vinnaren 100.000 kroner.
Åse Wetås var først ute med nyhenda på Twitter, kor ho kom med følgjande helsing til Årets nynorskkommune:
Annonse
– Gratulerer til Ål med aktivt, godt og systematisk nynorskarbeid! #heianynorsk
Prisen for Årets nynorskkommune vert årleg delt ut til ein kommune eller fylkeskommune som tek særleg godt vare på det nynorske skriftsspråket. Dette har juryen i forkant av utdelinga peika på at dei fire nominerte kommunane er svært gode på.
Dei nominerte kommunane syner nemleg, i følgje Språkrådet «solid språkleg sjølvkjensle og er gode døme på kva ein bør gjere som kommune for å halde nynorsken oppe som bruks- og kulturspråk.» Kvinnherad har på si side særskilt merka seg for å syne «slitesterke tiltak over tid og skal særleg ha ros for å vere medviten om tilhøvet mellom integrering og språkbruk.»
Kvinnherad har markert seg ved å kome til finalen for andre år på rad.
