Aktor: – Var i telefonen då ho vart drepen

Onsdag morgon starta rettssaka i Haugesund tingrett. Blant formalitetane som retten gjekk gjennom, var ein full opplesing av tiltalen. Den 48 år gamle mannen har site i varetekt sidan kvelde då Renate Strand Normann døde. På spørsmål frå dommaren sa han seg ikkje skuldig i tiltalen.

Hendingsforløpet

Då aktor gjekk gjennom hendingsforløpet slik dei teiknar det opp, kom det fram at Renate Strand Normann var i telefonen då ho vart angripen av tiltalte. Ho skal i telefon kl. 19.37 på dødsdagen 21. april 2021 sagt at ho var i eit basketak med tiltalte.

– Påtalemyndigheita si vurdering er at Normann snakka med [[namn på vitne]] då ho vart slått i hovudet med ein trestokk. Tiltalte var på staden heile tida medan det vart gitt livreddande førstehjelp. Politiet kom til staden kl. 21.50, Tiltalte vart då arrestert, og sendt til arresten i Bergen på kvelden. Han har vore i varetekt sidan då, sa aktor Benedikte Høgseth.

Førstehjelp

– Det vart gjort livreddande førstehjelp på staden av ein mann som kom tidleg til åstaden. Luftambulansen kom til Varaldsøy innan 30 minutt. Kvinna blødde kraftig frå bakhovudet, og hadde brot på hjerneskallen. Normann vart erklært død av luftambulanselegen på staden, la statsadvokaten til i gjennomgangen av hendingsforløpet.

I si innleiing siterte ho også frå fleire vitneobservasjonane som vart gjort både før og etter hendinga.

– Tiltalte og avdøde var bekjente, og det er uomtvisteleg at dei tok ferja til Varaldsøy saman tidlegare på ettermiddagen. Dei gjekk til fots til bustaden til tiltalte. Renate blei funnen umiddelbart etter hendinga, la aktor Benedikte Høgseth til.

Narkotika

Blodprøvar gjort på både avdøde og tiltalte påviste blant anna cannabis og amfetamin hos avdøde, og alkohol og ulike narkotiske stoff hos tiltalte, tilsvarande ei alkoholpåverking på mellom 1,5 og 2,0 promille.

Det vart referert at det var gjennomført psykiatriske vurderingar av tiltalte, der dei fann han å vera strafferettsleg tilrekneleg.

– Bevisførselen vil visa at tiltalte ikkje på noko vis vart angripen i samband i forkant av at Normann vart slått, men at ho tvert i mot stod i telefonen då dette angrepet kom, avslutta ho i si innleiiande del av drapstiltalen.

Aktor brukte også tid på å gå gjennom den andre delen av tiltalen, som går på vald i nære relasjonar mot ein tidlegare sambuar.

– Tiltalte vart angripen

Forsvarar Jørgen Riple var tydeleg usamd med aktor på fleire punkt. Han framsa i sin innleiingsprosedyre at tiltalte vart angripen like i forkant av valden han utøvde mot Normann. Forsvarar meinte også at ein tidlegare dom som Normann fekk i mars 2021, var relevant for retten, sjølv om aktor er av anna meining.

Han påpeika også at konsentrasjon av amfetamin i blodet hos avdøde var fire gongar høgare enn det som tilsvarer 1,2 i promille, om ein reknar det om til alkoholkonsentrasjon i blodet i trafikksaker.

Bistandsadvokaten varsla etterpå at han på vegne av dei tre av dei etterlatne har sett inn krav om oppreising.

Etter dei innleiande prosedyrane onsdag morgon, vart kriminalteknikarane frå politiet dei første inn i vitneboksen. Dei gjekk gjennom dei tekniske funna som vart gjort på åstaden, og trekte sine konklusjonar basert på funna.

– Me vurderer at tiltalte påførte Renate Strand Normann skadane ho døydde av, og me har funne DNA og blodspor på tre av stokkane, oppsummerte kriminalteknikarane frå vitneboksen.