Aktor ber om 16,5 års fengsel i kokainsaka

– Det er ikkje tvil om at dei alle er skyldige i det dei er tiltalte for, siterer NRK aktor og konstituert førstestatsadvokat Benedicte Hordnes på i samband med prosedyrane i saka der seks utlendingar vart arresterte for å ha henta 150 kilo kokain frå skipet «Nordloire» på Husnes i april i fjor.

Saka har gått i Hordaland tingrett gjennom heile mai, og onsdag bad aktor om at fire av dei seks tiltalte skulle dømmast til 16,5 år fengsel. For den femte tiltalte, ein mann på 30 år, ynskjer aktor at ein gjev strafferabatt og foreslår 13 år og to månader fengsel, rapporterer NRK. Den sjette av dei arresterte døydde i fengsel i vinter.

Dei tiltalte blei alle arresterte samtidig i etterkant at dei henta ut narkotikaen. Politiet og tolletaten hadde då spana på dei i to døger, inkludert helikopterovervaka operasjonen med å dykka ut til skipet som låg ved kaien til Hydro Husnes, der det henta kokainen.

Dei fem er tiltalte som ei organisert kriminell gruppe, for den såkalla mafiaparagrafen.

– Det framstår proft og velorganisert, sa aktor i retten onsdag, i følgje NRK.

– At dei ikkje visste det var kokain er så lite truverdig at forklaringane deira må utelukkast, sa aktor i prosedyren, og sa at det var usannsynleg at nokon ville gi eit slikt oppdrag utan å informera, eller at nokon ville ta eit slikt oppdrag utan å vita kva dei skulle henta, siterer NRK.