Aktive pensjonistar

– Der andre pensjonistforbund må seia seg nøydde til å avlysa bussturar og slikt grunna for få påmelde, så hadde til dømes me 53 påmelde i løpet av det fyrste døgeret til årets busstur i mai, seier ein sprudlande leiar Rita Martens Meyer.

– Fyrst og fremst trur eg at det er eit veldig godt samhald blant medlemane. Me har det utruleg kjekt, og me trivst i lag. I tillegg så er det interessante turar som blir lagt opp. Ofte turar rundt i nærmiljøet som inneheld masse historie. Til dømes så går turen i år til Bjørn West Muséet i Matre, fortset Martens Meyer.

Aktiv gjeng

Forbundet har møte éin gong i månaden, med unntak av sommarmånadane. I tillegg har dei fleire faste turar og hendingar gjennom året.

– I tillegg til bussturen i mai, så har me også ein overnattingstur i september og ein svært populær dans i oktober. Då blir me fort opp i 100 danseglade pensjonistar som har det veldig moro i lag, fortel den blide dama.

At Pensjonistforbundet HVØ er ein aktiv gjeng er det liten tvil om, for i tillegg til alt det andre, vert det også invitert inn ein føredragshaldar på kvart møte. Noko som i fylgje Martens Meyer også er svært populært å få med seg.

Til dømes så hadde dei kunnskapstørste pensjonistane nyleg Trygve Djuvsland på besøk for å snakka om dei gamle gruvene på Varaldsøy.

– Føredraget til Trygve Djuvsland trakk noko kolossalt med folk. Det var fullt hus, og veldig mykje mannfolk, ler Martens Meyer.

– Det var tydeleg eit emne som var ettertrakta, og Djuvsland var utruleg dyktig til å formidla og fortelja. Han hadde mykje kunnskap, og klarte til og med å føra historia frå gruvene på Varaldsøy til musikkinstituttet Barratt Due i Oslo, fortel ho vidare.

Den engasjerte leiaren skryt også veldig av medlemane og seier ho vert inspirert til å fortsetja når det dei finn på blir så godt motteke.

– Det er klart det er både kjekt og lett å jobba når medlemane er så engasjerte. I tillegg så jobbar alle me i styret utruleg godt i lag. Då må ein jo berre fortsetja, konkluderer leiar Martens Meyer.