Konfirmantane vil hiva ordføraren på Opsangervatnet:
– Absolutt klar for ein dukkert
I desse dagar er konfirmantane i gang med den årlege fasteaksjonen. Dei håpar å samla inn nok pengar til å senda ordføraren i vatnet.
Kirkens Nødhjelp skaffar årleg tilgang til reint vatn til rundt 1 million menneske. Eit viktig bidrag til dette arbeidet er pengane som blir samla inn i fasteaksjonen. Konfirmantane i Kvinnherad er blant dei som bidreg til denne innsamlinga. Gjennom fasteaksjonen får dei opplæring i urettferd og behova i verda, men og at dei kan vera med og gje håp til andre.
«Ville du latt dottera di gå 25 kilometer, frå Dimmelsvik til Husnes for å henta vatn?», opner Jan Ove Fagerheim med i ei pressemelding.
Annonse
Kvar dag går nemleg jenter i mange land langt for å henta vatn.
«Tida dei brukar på dette går utover skulegang, lekser og samvær med andre. I tillegg er dei utsette for fare på den lange vegen. Dette er noko av det ein kan vera med på å endra, om ein støttar fasteaksjonen i Kvinnherad», skriv han.
Spenstig insentiv
I dei fleste bygdene i Kvinnherad kjem det konfirmantar rundt med innsamlingsbøsser på dørene tysdag 8. og onsdag 9. april. I tillegg hadde konfirmantane aksjonsdag laurdag 5. april. Då hadde dei stand på Husnes storsenter for å samla inn pengar.
Annonse
Og klarar ungdommane i Kvinnherad å samla inn totalt 250.000 kroner, har fungerande ordførar Thea Vaage sagt seg villig til å bli kasta i Opsangervatnet.
– Eg tenkjer alt som kan motivera til å samla inn pengar er bra, og eg er absolutt klar for ein dukkert. Konfirmantane gjer ein viktig innsats, og då dei tok kontakt kunne eg ikkje seia nei, smiler ordføraren, som førebels ikkje angrar på å ha sagt ja til initiativet.
– No berre håpar eg dei klarar å nå målet, og gjerne at dei kjem langt over også, legg Vaage til.
Gå på vatnet
Og klarar konfirmantane å samla inn ein kvart million kroner, er planen at ordføraren må i vatnet før påske.
– Det må jo framleis vera litt kaldt, så vi kan ikkje venta for lenge, meiner ho.
Annonse
Fagerheim fortel at det også kom eit forslag frå ein av konfirmantane om at dersom dei klarte å samla inn 1 million kroner, så måtte alle prestane i Kvinnherad gå på Opsangervatnet.
«Men det skal vel noko til for at noko av det skjer», sluttar han pressemeldinga med.
