905.000 kroner til grasrota

164 lag og organisasjonar i Kvinnherad fekk til saman 905.412 kroner i årets andre utbetaling frå Grasrotandelen.

Årets første utbetaling skjedde då idretten rundt om i landet låg brakk, noko som også gav utslag på summen som våre lokale grasrotmottakarar fekk. For i perioden mellom 1. januar og 1. mai fekk kommunen sine lag utbetalt 817.000 kroner.

Årets andre utbetaling er vesentleg høgare. I perioden mellom 1. mai og 31. august får nemleg 164 lag og organisasjonar i Kvinnherad til saman 905.412 kroner frå Norsk Tipping sin Grasrotandel.

Men det er ikkje det einaste som har auka sidan fyrste utbetalingsperiode. Talet på givarar har også blitt vesentleg høgare på den korte tida.

Ved årets fyrste utbetaling var det 4.299 tipparar som hadde registrert eit lag i Kvinnherad som sin grasrotmottakarar, no er talet oppe i 4.448. Det betyr også at kvar Kvinnherad-givar i snitt no er verd 203,50 kroner.

Mest i Kvinnherad er det igjen IL Trio som får med 89.438 kroner frå sine 381 givarar, det er nesten dobbelt så mykje som Halsnøy IL sine 45.143 kroner får frå deira 255 givarar.

Totalt utgjer årets andre oppsamlingsperiode over 238 millionar kroner for landets 30.000 forskjellege frivillige lag og organisasjonar.