– 90 prosent skatt er for mykje

Behovet for å presentera Sunnhordland Kraftlag (SKL) for formannskapet er minimalt, så Mjånes brukte mesteparten av tida på å utdjupa kvifor kraftsituasjonen og kraftprisen har vore slik han er.

– Det er energikrise i Europa, og energipriskrise i Norge. Me har hatt tyske prisar i 20 år, ikkje berre dei siste åra. No er det slik at ein bruker dei til ei kvar tid rimelegaste energikjeldene. I ein normal situasjon vil kolkrafta vera den dyraste, og med det blir kolkrafta det som definerer kraftprisen. I år har det vore heilt annleis, forklarte Mjånes.

Hetebølgje

Gassen som Russland tidlegare har eksportert til Europa er no borte, noko som har drive prisen på mellom anna norsk gass høgt opp, og dermed straumprisen ditto opp.

– Dette har slått inn samtidig som ein har hatt ein ekstrem tørke i Europa. Frankrike fekk trøbbel med kjernekrafta si på grunn av tekniske problem som følgje av hetebølgje og lite kjølevatn. Den same tørka førte til at ein ikkje fekk transportert kol på elvane, og med det vart det produsert mindre kolkraft, utdjupa SKL-sjefen.

Også for den norske kraftproduksjonen har året sommar vore spesiell.

– I Kvinnherad regna det nok, og breen har gitt nok vatn frå seg. Fyllingsgraden vår er slik han skal vera no, og det renn snart over i nokre av våre dammar. Men Sør-Norge har hatt sitt tørraste år på 20 år, og då hjelper det ikkje nok med våt sommar og haust hos oss, sa Mjånes.

Han forklarte også at SKL har skrinlagt planane om å byggja ut Blåfalli Fjellhaugen kraftverk, slik han utdjupa i Grenda 6. oktober.

– Å betala 90 prosent skatt er for mykje [på alt over 70 øre pr kilowattime, journ.merk], og tar vekk heile oppsida for ei utbygging som det. Det som kom i skattepakken i slutten av september skattelegg alt, enten ein går med overskot eller ikkje. Grunnrenteskatten er noko anna, for det er ein skatt du betaler av overskotet ditt, etter alt er trekt i frå, som til dømes investeringar, poengterte Mjånes.

Hydrogen

Han fortalte også at dei hadde tre-fire prosjekt som dei hadde håpt dei ville klara å få fram til investeringsavgjersle, men som no er blitt usikre. Han var så vidt innom havvindengasjementet i Deep Wind Offshore, der SKL eig 18,75% og kor dei satsar mest på å byggja ut på Utsira Nord-feltet.

– Demokratiske prosessar kan frustrera fordi dei tar tid, men det er fungerer godt. Offentleg eigarskap fører pengar tilbake til samfunnet. Politisk stabilitet viktig er viktig for oss, for me jobbar over lange horisontar. Nye kraftverk som brukar nytt vatn skal me klara å byggja til å bli lønsame på 70 øre/kWh. Ein byggjer den krafta som er rimelegast til ei kvar tid, argumenterte John Martin Mjånes.

– Har ikkje myndigheitene vore obs på dette med skattelegginga? ville Leif Sverre Enes vita.

– Det eine handlar om investeringsfinansieringa, det andre er tida det skal gjelda. Me veit ikkje kor lenge det gjeld. Det hadde det vore logikk i at det varte like lenge som straumstøtta, svarte Mjånes.

Gunnar Våge spurde om det er noko håp om hydrogenproduksjon i Kvinnherad.

– Me har gått vekk frå stor produksjon, til dømes i Matre, og heller for fleire små anlegg nær der det er forbruk. Grøn Næringspark i Kvinnherad er ein stad me absolutt ser for oss å ha hydrogenproduksjon, sa Mjånes.