78 millionar til born, unge og sårbare grupper

Pengane skal gå til ulike tiltak i regi av frivilligheita, som sosiale aktivitetar, hjelpetelefonar og tiltak for å førebyggje vald og overgrep. Forslaget kjem som ei følgje av pandemien og konsekvensane av denne.

– Pandemien har hatt og har framleis stor innverknad på kvardagen til barn og unge. Målet med å styrkje desse tiltaka er å redusere belastninga og betre tryggleiken for dei som har det vanskeleg. Frivilligheita har ei sentral rolle når det gjeld å ta vare på barn og unge og sårbare grupper, seier barne- og familievernminister, Kjersti Toppe (Sp).

Fordeling av tiltakspakken

Tiltakspakka er føreslått fordelt på denne måten:

∘ 50 millionar til stimuleringsprogrammet for frivilligheita (Dam-stiftinga)

∘ 10 millionar fordelt på desse hjelpetelefonane; Alarmtelefonen for barn og unge, Røde Kors sin hjelpetelefon Kors på halsen, og Mental helse sin hjelpetelefon, Foreldresupport

∘ 9,5 millionar til digitale arrangement og tiltak i regi av trus- og livssynssamfunna

∘ 7,5 millionar til tilskotsordninga for tiltak mot vald og overgrep

∘ 1 million til informasjonstiltak for å gjere tenester for born, unge og foreldre betre kjende

Mest til frivillig helsearbeid

Om forslaget blir vedteke vil den største summen gå til Stimueringsprogrammet, som blir drifta gjennom Dam-stiftinga.

Stiftinga har drifta Stimuleringsprogrammet på vegne av Helse- og omsorgsdepartementet sidan sommaren 2020. Så langt er totalt 165 millionar kroner fordelt gjennom programmet.

– Med nye 50 millioner kroner i potten kan ei rekkje nye tiltak få støtte, skriv Dam-stiftinga på nettstaden sin.

Programmet behandlar søknadar fortløpande, og det går såleis kort tid frå ein søkjer, til ein får svar.