«71 grader nord - team» under innspeling i Kvinnherad
I desse dagar er det innspeling av det nye konseptet «71 grader nord - team» i Kvinnherad. Konseptet går ut på at fire par med kjendisar skal kjempa seg gjennom tøffe prøvingar i norsk natur, og truleg vil den flotte naturen i Kvinnherad vera å sjå i det komande programmet.
Publisert
Sist oppdatert
Måndag føremiddag møtte den utsendte frå Grenda programleiar Tom Stiansen. Han kunne fortelja smått om det nye «71 grader nord» konseptet, og kvifor dei la turen til nettopp Kvinnherad.
Blant sesongens kjendispar finn ein programleiar Jon Almaas (54) og komikar Adam Schjølberg (39), og influenserane Vita (29) og Wanda (29) Mashadi. Treningsinfluenser Victoria Tolaas (21) er i par med YouTube-profil og podkaster Safari Shabani (24), og tidlegare skiløpar Thomas Alsgaard (49) kjempar på lag med journalist og eventyrar Elisa Røtterud (42).
Annonse
Dei to kjendisane som samarbeider best, og kryssar mållinja fyrst, står att som vinnarane av historias fyrste «71 grader nord - team».
– Det er fire faste par som må forholda seg til kvarandre. Deltakarane vil forflytta seg parvis heile tida, på kryss og tvers av landet. Og i år vert det ikkje like mange konkurransar og utveljingar som vanleg, fortel Stiansen.
Trivs i kommunen
Innspelinga starta for tre veker sidan, og varer alt i alt fire veker. Laurdag la dei turen til Kvinnherad, og i morgon set dei kurs mot neste destinasjon.
Annonse
– Det er fantastisk fint her i Kvinnherad, og staden byr på mange moglegheitar. Det er difor me kjem attende gong på gong. Me overnattar på Rosendal Fjordhotell, og det passar bra for heile riggen då ein får god kombinasjon med logistikken og naturen. Me har eit hyggeleg samarbeid med hotellet, smilar han og held fram:
– Eg likar meg godt her. I gamle dagar var eg mellom anna mykje i Jondal og stod på ski. Og i går, då eg hadde ei ledig stund, gjekk eg opp på Malmangeruten. Det var ei flott utsikt som møtte meg. Eg gjekk same turen i 2015. Det er nok det fjellet eg likar best. Det er både kortreist og lett turføre.
Under praten kjem han med ein liten historie frå tidlegare innspeling i Kvinnherad.
For nokre år sidan var me også i Kvinnherad under innspeling. Då fekk crewet og eg ein forferdeleg oppleving under turen til Bjørndalstraversen. I ettertid kalla me den for «Bjørndalsparversen». Me gjekk i eit forferdeleg ver, og turen tok over 20 timar. Det går gjetord om denne turen endå, ler han.
Følar seg privilegert
Tom Stiansen kan vidare røpe at deltakarane har vore i høgda i Uskedalen. Og då han tok dei vel i mot i mål, var dei alle svært nøgde med naturen og turforholda.
Annonse
– Dei kosar seg på tur. No er alle laga i mål, og har slege opp ein felles camp for natta.
I dei siste åra har Stiansen sjølv konkurrert mot deltakarane.
– I ein eller anna form vert eg involvert, og det er veldig gøy. Eg likar å kjenne på det dei kjennar på. Det er ikkje så viktig å vinne, for alt er morosamt å oppleve uansett. Det er mellom anna svært koseleg å sitje rundt leirbåle saman. Eg blir kjent med deltakarane på ein heilt anna måte.
Stiansen har no vore programleiar i over ti år, og kvar veke geleidar han deltakarane gjennom diverse etappar. Han fortel at han på ingen måte har tenkt å gi seg.
– Eg syns det er kjempe gøy å jobbe med eit så kreativt crew. Det er flinke folk i alle ledd, og eg følar meg rett og slett privilegert som får vera front figur i eit så godt likt TV-program. Om eg nokon gong må slutte, må dei bera meg ut her i frå, ler han.
Det komande «71 grader nord» programmet vil mogleg kunna sjåast på TVNorge i vår sesongen.
Annonse
– Eg tippar det vil byrja å bli sendt ein gong på vinteren, truleg etter OL, sluttar Stiansen.
