62 meter segleluksus på besøk

Skonnerten M/Y «Athos» kostar 185.000 euro å leiga for ei veke. I helga hadde seglskuta funne vegen til Rosendal.

Det er ikkje noko kva som helst skute som har ankra opp i Skålavikjo i Rosendal denne helga. Det 62 meter lange skroget ser smekkert ut, og to skyhøge master gjer båten synleg også for auge som ikkje står i flomålet.

Båten har fem lugarar og kan ta ti gjester, og samstundes følgjer det med eit mannskap på ti personar. Herlegheita er på inga måte gratis. Det set deg tilbake minst 185.000 euro i veka, eller snaue to millionar kroner med dagens kurs.

No er neppe dagens kronekurs det som uroar dei som har leigd båten denne veka, for båten er spekka med luksus, og har i følgje kjelder eit skyhøgt teknologisk nivå på utstyret om bord. I følgje utleigaren skal båten ha «nydeleg interiør og eksteriør, og imponerande fritids- og underhaldningsfasilitetar»

Båten blei bygd i 2010, er 62 meter lang og har ein tonnasje på 370.

– Dei har ikkje gått via oss, så denne båten veit eg like lite om som deg, seier Øyvind Lernes i Rosendal Hamn til Grenda.