61 millionar på veg: Kvinnherad får rekordutbetaling frå Havbruksfondet

– Det kjem rekord frå havbruksfondet i år, på 61 millionar kroner frå fondet, noko som er ca. 20 millionar meir enn Kvinnherad kommune hadde budsjettert med, opplyste stortingsrepresentant Hans Inge Myrvold (Sp) på ein pressekonferanse om fondet måndag.

Rekord

Annakvart år kjem det store utbetalingar frå Havbruksfondet, som eit direkte resultat av inntektene som auksjonane mo konsesjon har gitt. 2024 er eit slikt år. I år kan økonomisjef Erlingsson venta seg 61 millionar inn i kommunebudsjettet, medan ein i dei samanliknbare åra 2022 og 2020 fekk 43,2 og 31,2 millionar.

Grunnen til auken er eit skatteforlik i Stortinget.

– Forliket gjer at heile provenyet frå produksjonsavgifta pr. tonn slakta laks no går til kommunane. Fylkeskommunane får også meir, og Vestland får i år 190 millionar kroner, 100 millionar meir enn budsjettert, opplyste Myrvold på pressebriefinga.

Han gledde seg om ver Kvinnherad sin posisjon som den kommunen i Vestland som har fått mest frå havbruksfondet.

– Ein er no på 167 millionar på fire år. Det er desidert mest av alle. Det betyr at ein er store på havbruk, og i posisjon til å nyta godt av dette forliket. Ein sikrar med dette at mest mogeleg av verdiskaping kjem tilbake til vertskommunane, la Myrvold til.

Aldri i betre posisjon

Som representant for regjeringspartia, er Myrvold glad for utviklinga til kommunane i inneverande stortingsperiode.

– Kvinnherad sin finansielle posisjon er styrka gjennom denne perioden, pluss at kommunen driv god forvaltning av sine kraftinntekter. Eg tør påstå at Kvinnherad aldri har vore i betre posisjon, og kan no utvikle seg som kommune, meiner Myrvold.

Kvinnherad for meir enn både Øygarden og Austevoll

Av nabokommunar ser ein at Tysnes får 33 millionar frå fondet i år, Bømlo 47 millionar, Ullensvang 17,4 millionar og Kvam 22,6 millionar.

– Det er ingen vekst i sona som Kvinnherad ligg i (i trafikklyssystemet som ein nyttar er Hardangerfjorden på raudt lys, journ.merk). Nedtrekk kunne sendt inntektene frå fondet ned for Kvinnherad, og skatteendringa her er viktig for å behalda inntekt til kommunane, poengterte Myrvold.

Han poengterte at denne avgifta kjem i fråtrekk på skatten hos produsentane, og belastar såleis ikkje produsentane ekstra.

– Det er ei vriding i distriktsvennleg retning, og det ligg ei meirinntekt her i dette forliket, slutta Myrvold.

– Friske midlar

Stortingsrepresentant Marte Mjøs Persen frå Arbeiderpartiet peikar i ei pressemelding på at havbruksnæringa utgjer ein betydeleg del av verdiskapinga i Noreg. At ein større del av verdiskapinga no tilfell vertskommunane og lokalsamfunna er heilt avgjerande, uttrykkjer ho.

– Dette syner at regjeringa held det ho lovar. Heile provenyet frå produksjonsavgifta frå havbruksnæringa tilfell kommunane slik me sa det skulle. Midlane er friske midlar som bidreg til velferd og utvikling lokalt. Det er lokalpolitikarane som veit kor skoen trykkjer mest som no kan disponera midlane slik dei sjølv vil, held Persen fram.